HA ASATI metuwan geli uttidosona. Eti baqatana koshshees; hegee xayikko, hayqqoosona. Eti xomoosuwau biida Israaˈeeleta, qassi eta maaddaydda deˈiya maccaasiyaa Raˈaabo. Raˈaaba Yarkko katamaa dirssaa gimbbiyaara oyqqetti keexettida ha keettan deˈausu. Ha asati metuwan waani gelidaakko ane beˈoos.

Israaˈeeleti Kanaane biitti gelanau, Yorddaanoosa SHaafaa pinnanau giigi uttidosona. Eti pinnanaappe kase, Yaasu xomoosiya naaˈˈu asata kiittiis. I, etayyo: ‘Biidi biittaanne Yarkko Katamaa xomoosite’ yaagiis.

Xomoosiyaageeti Yarkko gakkidi, Raˈaabi soo biidosona. SHin issi asi Yarkko kawuwaassi: ‘Naaˈˈu Israaˈeele asati hachchi qammi biittaa xomoosanau yiidosona’ yaagidi yootiis. Kawoy hegaa siyidi Raˈaabi soo asaa kiittin, eti o: ‘Ne soo yiidi gelida asata kessada imma!’ yaagidi azazidosona. SHin Raˈaaba xomoosiyaageeta shakkuwan qottaasu. Yaatada a: ‘Amarida asati ta soo yiidosona; shin eti auppe yiidaakko taani erikke. Eti saˈay lankki lankkiyaagan katamaa penggee gorddettennan deˈishin kiyidi biidosona. Ellelliyaabaa gidikko, intte eta gakkana!’ yaagaasu. Yaatiyo gishshau, asati eta kaallidi biidosona.

Eti bi simmin, Raˈaaba eesuwaara shakkuwaa pude kiyaasu. A xomoosiyaageetussi hagaadan yaagaasu: ‘Yihooway ha biittaa inttessi immanaagaa taani erayis. Intte Gibxxeppe kiyiyo wode, i Zoˈo Abbaa waati melissidaakko nuuni siyida; qassi intte Sihoonanne Ooga geetettiya kawota waati woridaakko siyida. Taani inttessi kehido gishshau, inttekka taassi kehanau hayyanintta qaalaa gelite. Ta aawaa, ta aayyiyo, ta ishanttanne ta michchota ashshite’ yaagaasu.

Xomoosiyaageeti eeno giidosona; shin Raˈaaba issibaa oottana bessees. Xomoosiyaageeti haagaadan yaagidosona: ‘Ha zoˈo wodoruwaa ekkada maskkootiyan qachcha; qassi ne dabbota ubbaa nenaara ne son wotta. Yarkko katamaa oyqqanau yiyo wode, ha zoˈo wodoruwaa ne maskkootiyan beˈidi, ne son deˈiya asa worokko’ yaagidosona. Xomoosiyaageeti Yaasukko simmi biidi, hanettidabaa ubbaa assi yootidosona.