GEESHSHA MAXAAFAN Uruto geetettiya maxaafaa demmaasa. He maxaafay Israaˈeele biittaa, daannati ayssiyo wode deˈida issi keettaa asaa taarikiyaa yootees. Uruta Mooˈaaba biittappe yiida yelaga maccaasa; a Xoossaa asa gidida Israaˈeele zare gidukku. SHin Uruta tumu Xoossaa Yihoowabaa tamaarada, Yihoowa keehippe siiqiya asa gidaasu. Naaˈooma Uruta Yihoowabaa tamaaranaadan maaddida cima maccaasa.

Naaˈooma Israaˈeele biitta maccaasa. Naaˈooma, i keettaawaynne i naaˈˈu attuma naati, Israaˈeele biittan namisay gelin, Mooˈaaba biitti deˈanau biidosona. Hegaappe, issi gallassi Naaˈoomi azinay hayqqiis. Takkidi Naaˈoomi naaˈˈu naati Urutonne Orppo geetettiya Mooˈaaba biittaa macca naata ekkidosona. Hegaappe 10⁠u laytta gidiyaagaa takkidi, Naaˈoomi naaˈˈu naati hayqqidosona. Naaˈoomanne he naaˈˈu macca naati ay keenaa azzanidonaasha! Naaˈooma haˈˈi waananau deˈay?

Naaˈooma issi gallassi ba asaakko guyye haaho biitti simmanau qofaa qachchaasu. Urutanne Orppa iira deˈanau koyido gishshau, etikka iira baanau denddidosona. SHin eti guutta ogiyaa bi simmin, Naaˈooma naatukko simmada: ‘Guyye intte soo simmi biidi intte aayetuura deˈite’ yaagaasu.

Naaˈooma he macca naata saro deˈite gaada yeraasu. Eti Naaˈoomo keehippe siiqiyo gishshau, yeehuwaa doommidosona. Eti: ‘CHii! Nuuni nenaara ne asaakko baana’ yaagidosona. SHin naaˈooma: ‘Hay ta naatoo, simmite. Intte intte son deˈiyoogee inttessi loˈˈo’ yaagaasu. Yaatin Orppa simmada guyye biyoogaa doommaasu. SHin Uruta simmabeykku.

Naaˈooma ikko simmada: ‘Orppa baychchaasu. Neenikka iira ba’ yaagaasu. SHin Uruta: ‘Neeppe shaahettanaadan tana waayissooppa! Taani nenaara baana. Taani neeni biyoosaa baana; neeni deˈiyosan deˈana. Ne asay ta asa gidana; qassi ne Xoossay ta Xoossa gidana. Ne hayqqiyoosan taani hayqqana; qassi ta moogettanaykka yaana’ yaagaasu. Uruta hegaadan gin, Naaˈooma o guyye simmanaadan zaarettada waayissabuukku.

Wurssettan he naaˈˈu maccaasati Israaˈeele biitti gakkidosona. Yan deˈiyoogaa doommidosona. Eti gakkidoy banggaa cakkiyo wode gidiyo gishshau, Uruta sohuwaarakka bangga gadetun oottiyoogaa doommaasu. Booˈeeza giyo bitanee ba gadiyaappe a banggaa shiishshanaadan oottiis. Booˈeeza aayyiyaa oonakko eray? A Yarkko katamaa maccaasiyo Raˈaabo.

Issi gallassi Booˈeezi Urutiyyo: ‘Neeni Naaˈoomiyyo ay keena kehidaakko, taani nebaa ubbabaa siyaas. Neeni ne aawaanne ne aayyiyo qassi ne biittaa aggada, kase ne erenna asaara deˈanau waanada yiidakko erayis. Yihooway neeyyo keho!’ yaagiis.

Uruta: ‘Ta godau, neeni taayyo daro kehadasa. Taayyo kehabaa haasayada, tana minttettadasa’ yaagada zaaraasu. Booˈeezi Uruto keehippe dosiisinne gamˈˈennan o machchiis. Hegee Naaˈoomo ayba ufayssidee! SHin Naaˈooma hegaappekka aaruwaa ufayttidoy, Urutanne Booˈeezi bantta koyro naˈaa Yoobeeda yelido wode. Guyyeppe Yobeedi Daawita aawaa aawa gidiis. Nuuni takkidi Daawitabaa darobaa tamaarana.