HAHA! Asay ay oottiiddi deˈii? Issi maraakko woosaa shiishshiiddi deˈoosona. Hegaa eti ayssi oottiyoonaa?

Muusee deriyaa kiyidi daro gallassaa gamˈˈin, asay: ‘Muusee waanidaakko nuuni erokko. Yaatiyo gishshau, ha biittaappe nuna kaalettidi kessiya xoossa ane medhdhoos’ yaagidosona.

Muuse ishaa Aarooni: ‘Eeno; intte hayttan deˈiya worqqaa kessidi, taayyo ekki yiite’ yaagiis. Asay ehin, Aarooni hegaa seerissidi worqqa maraa medhdhiis. Asaykka: ‘Gibxxeppe nuna kessida nu Xoossay hagaa!’ yaagiis. Hegaappe Israaˈeeleti gita gibiraa giigissidi, worqqaappe merettida maraassi goynnidosona.

Yihooway hegaa beˈidi daro yiillotiis. Yaatiyo gishshau, Muusessi: ‘Eesuwan duge wodhdha. Asay daro iittabaa oottees. Eti ta higgiyaa dogidi worqqaappe merettida maraayyo goynniiddi deˈoosona’ yaagiis.

Muusee ellellidi deriyaappe duge wodhdhiis. I etakko matattido wode kaallidi deˈiyaabaa beˈiis. Asay worqqa maraa yuushuwan yexxoosonanne duroosona! Muusee keehippe yiillotido gishshau, higgeti etan xaafetti uttido naaˈˈu masettida shuchchata olin, he shuchchati kinchchetti aggidosona. Hegaappe Muusee, Worqqa maraa ekkidi seerissiis. Hegaappe guyyiyan gaaccidi liiqissiis.

Asay keehippe iitabaa oottiis. Yaatiyo gishshau, Muusee asaappe amaridaageeti bantta bisuwaa oyqqanaadan yootiis. Muusee: ‘Worqqaappe merettida maraassi goynnida iita asay hayqqana bessees’ yaagiis. Yaatin he asati 3,000⁠u asaa woridosona! Nuuni Yihoowappe attin hara ayba eeqaayyonne goynnennaadan naagettana koshshiyoogaa, hagee bessenee?