HA YARKKO dirssaa gimbbee kunddanaadan oottiyabay aybee? Wolqqaama bombbiyan laalettiyaabaa milatees. He wode etassi bombbee attoshin zayyeenne baawa. Hagee Yihooway oottido hara maalaalissiya ooso! Hegee waanidi hanidaakko ane tamaaroos.

Yihooway Yaasa woygidaakko siya: ‘Neeninne nenaara deˈiya olanchcha asati katamaa yuuyite. Usuppuntta gallassi gakkanau hachchi hachchi katamaa issitoo yuuyite. Maachchaa taabootaa ekkidi biite. Laappun qeeseti bantta malkkataa punniiddi appe sinttaara boona.

‘Laappuntta gallassi katamaa laapputtoo yuuyite. Hegaappe keehippe malkkataa punnitenne ubbaykka ola waasuwaa waassite. Yaatikko dirssaa gimbbee laaletti aggana!’ yaagiis.

Yaasunne asay Yihooway giidoogaadan oottidosona. Yuuyiyo wode ubbaykka coˈˈu giidi yuuyidosona. Ooninne qaala qaattibeenna. Eta hemeta giirettappenne malkkata cenggurssappe attin harabi siyettibeenna. Yarkkon deˈiya Xoossaa asaa morkketi yayyennan aggibookkona. Maskkootiyan kaqettida he zoˈo wodoruwaa beˈay? Hegee o maskkootee? Ee, Raˈaaba xomoosiya naaˈˈu asati issi yootidoogaadan oottaasu. I soo asay ubbay iira hanettiyaabaa naagiiddi son deˈoosona.

Wurssettan, laappuntta gallassi, katamaa laapputtoo yuuyoogaappe guyyiyan, malkkatay punettiininne olanchcha asati waassin, dirssaa gimbbee kunddiis. Hegaappe Yaasu: ‘Kataman deˈiya ubbaa woridi, katamaa xuuggite. Ubbabaa xuuggite. Biraa, worqqaa nahaasiyaanne birataa xallaa ashshidi, Yihoowa dunkkaaniyan minjjiyo sohuwan wottite’ yaagiis.

Naaˈˈu xomoossiyaageetuyyo Yaasu: ‘Raˈaabi soo biidi, onne i soo asaa ekki yiite’ yaagiis. Raˈaabanne i soo asay xomoosiyaageeti qaalaa gelidoogaadan attidosona.