QAALAA gelada polanau metoota eray? Ha misiliyan deˈiya bitanee hegaadan haniis, i azzanidoykka hegaassa. He bitanee Yofttaaha geetettiyaa Israaˈeeletu xala daannaa.

Yofttaahee deˈidoy Israaˈeeleti Yihoowassi goynniyoogaa aggido wodiyaana. Eti zaarettidikka iitabaa oottidosona. Yaatin Yihooway Amoona asay eta qohanaadan oottiis. Hegee Israaˈeeleti: ‘Nu ne bolli nagaraa oottida. Hayyanaa nuna ashsharkkii!’ yaagidi Yihoowakko waassanaadan oottiis.

Asay bantta oottido iitaban azzanidosona. Zaarettidi Yihoowassi goynniyoogan azzanidoogaa bessidosona. Hegaa gishshau, Yihoowaykka zaarettidi eta maaddiis.

He iita Amoona asata olanaadan asay Yofttaaha dooriis. He olan Yihooway bana maaddanaadan Yofttaahee keehi koyiis. Hegaa gishshau i Yihoowayyo: ‘Taani Amoonata xoonanaadan neeni oottikko, taani olan xoonada simmiyo wode, tana mokkanau ta sooppe kiyiya uraa neeyyo immana’ yaagidi qaalaa geliis.

Yihooway Yofttaahee gelido qaalaa siyidi, olan xoonanaadan a maaddiis. Yofttaahee soo simmiyo wode, a mokkanau sooppe koyro kiyiday oonakko eray? Kiyidaara ayyo mexi issi naˈa gididaaro. Yofttaahee: ‘Poora ta naˈee! Tana kaushsharggadasa. SHin taani Yihoowassi qaalaa gela uttaas; he qaalaa gelidobaa polennan agganau danddayikke!’ yaagidi yeekkiis.

Yofttaahe naˈiyakka he i gelido qaalaabaa siyada koyro azzanaasu. He i gelido qaalay, a ba aawaanne ba laggeta aggada baanaadan oottiyaaba. SHin a ba deˈo laytta ubban Seelon deˈiya Yihoowa dunkkaaniyan oottanau deˈausu. Hegaa gishshau a ba aawaayyo: ‘Yihoowassi neeni qaala gelidabaa gidikko, polana bessees’ yaagaasu.

Yaatiyo gishshau, Yofttaahe naˈiyaa Seelo baada, ba deˈido layttan Yihoowassi a dunkkaaniyan oottaydda deˈaasu. Layttan layttan oyddu gallassaassi Israaˈeele maccaasati o oychchanau yaa biidi, wodiya iira ufayssan aattoosona. A hegaadan Yihoowayyo oottiya loˈˈo asa gidiyo gishshau, asay Yofttaahe naˈiyo siiqees.