ISRAAˈEELETI Yorddaanoosa SHaafaa pinniyaageeta beˈa! SHin haattay au biidee? Layttaa giddon he wodee daro iray bukkiyo wode gidiyo gishshau, guutta daqiiqaappe kase shaafay keehi kixxiis. SHin haˈˈi haatta ubbay baawa! Israaˈeeleti kase Zoˈo Abbaa pinnidoogaadan, haˈˈikka melida biittaara pinniiddi deˈoosona! Haattay ubbay au biidee? Ane beˈoos.

Israaˈeeleti Yorddaanoosa SHaafaa pinniyo wodee gakkin, Yaasu asaassi yootanaadan Yihooway koyidobay hagaa: ‘Qeeseti maachchaa taabootaa ekkidi nuuppe sinttaara baana koshshees. Eti bantta tohuwaa Yorddaanoosa SHaafan yeddin, haattay goggiyoogaa aggiigana’ yaagiyaagaa.

Yaatiyo gishshau, qesseti maachchaa taabootaa tookki ekkidi, asaappe sinttaara biidosona. Eti Yorddaanoosa gakkin, qeeseti haattaa giddo bantta gediyaa yeddidosona. Haattay keehi ciimmanne wolqqaama gogetta goggees. SHin eta gedee haattaa bochchaanne haattay gogettaa aggiyoogaa doommiis. Hegee maalaalissiyaabaa! Haattay yiyo baggan Yihooway haattaa essi wottiis. Hegaa gishshau, sohuwaara haattay shaafaappe xayi aggiis!

Maachchaa taabootaa tookkida qeeseti melida shaafaassi giddo biidosona. Eta misiliyan beˈay? Eti yan eqqidaashin, Israaˈeeleti ubbay melasaara Yorddaanoosa SHaafaa hemettidi pinnidosona!

Ubba asay pinni simmin, Yaasu 12⁠u mino asatuyyo kaallidi deˈiyaagaadan gaanaadan Yihooway yootiis: ‘Qeeseti maachchaa taabootaa tookkidi eqqidosaa shaafaa biite. Biidi 12⁠u shuchchata ehiidi, hachchi qammi intte ubbay shemppiyoosan doorite. Yaatidi, sinttappe intte naati ha shuchchati aybee yaagidi oychchiyo wode, Yihoowa maachchaa taabootay Yorddaanoosa pinniyo wode haattay gogettaa aggidoogaa etassi yootana koshshees. Ha shuchchati he maalaalissiya oosuwaa inttena hassayissoosona!’ yaagiis. Yaasu qeeseti eqqido haattay goggiyo sohuwankka 12⁠u shuchchata essiis.

Wurssettan Yaasu maachchaa taabootaa tookkida qeeseta: ‘Yorddaanoosappe kiyite’ yaagiis. Eti kiyosaarakka, shaafay zaarettidi goggiyoogaa doommiis.