DAAWITI Gooliyaada wori simmin, Israaˈeele olanchchatu halaqay Abaneeri a Saaˈoolakko efiis. Saaˈooli Daawita keehi dosiis. Saaˈooli ba olanchchatu giddon a halaqa oottidi, kawo keettan deˈanaadan ekki efiis.

Hegaappe guyyiyan, olanchchati Pilisxxeematuura olettidi simmiyo wode, maccaasay: ‘Saaˈooli shaˈaa woriis; shin Daawiti tammu shaˈaa woriis’ yaagidi yexxidosona. Daawitassi Saaˈoolaagaappe daro bonchchoy immettido gishshau, hegee Saaˈooli a qanaatanaadan oottiis. SHin Saaˈoola naˈaa Yonaataani qanaatibeenna. I Daawita keehippe siiqees, qassi Daawitikka a siiqees. Yaatiyo gishshau, eti naaˈˈay audekka gidin issoy issuwaayyo lagge gididi deˈanau qaalaa gelidosona.

Daawiti diittaa loytti diixxiyo gishshau, Saa⁠ˈooli i diixxishin siyiyoogaa dosees. SHin issi gallassi qanaatee issi keehippe iitabaa Saaˈoola oottisiis. Daawiti diittaa diixxishin Saaˈooli: ‘Taani a godaara gattada sikkana!’ yaagidi ba toora akko xonggiis. SHin Daawiti deshidi aattin, tooray a haliis. Hegaappe takkidi, Saaˈooli naaˈˈanttuwaakka tooraa xonggidi Daawita haliis. Yaatiyo gishshau, haˈˈi Daawiti keehippe naagettana koshshiyoogaa eriis.

Saaˈooli gelido qaalaa hassayay? Gooliyaada woriya uraayyo ba naˈiyo machcho oottidi immanau qaalaa geliis. Wurssettan Saaˈooli ba naˈiyo Miikaalo Daawiti ekkana danddayiyoogaa yootiis shin, Daawiti koyro, morkke Pilisxxeematuppe 100ta worana koshshees. Ane hegaa qoppa! Saaˈooli Pilisxxeemati Daawita woranaagaa qoppidoogee qoncce. SHin eti Daawita woribookkona; yaatin Saaˈoli ba ­naˈiyo assi machcho oottidi immiis.

Issi gallassi Saaˈooli Yonaataanassinne ba ashkkaratu ubbaassi Daawita worana koyiyoogaa yootiis. SHin Yonaataani ba aawaassi: ‘Daawita qohoppa. I neeyyo aybanne balabaa oottibeenna. Hegaappe ubba i oottido ubbabay nena keehi maaddidaba. I Gooliyaada worido wode ba shemppuwau qarettibeennaagaa beˈada, neenikka ufayttadasa’ yaagiis.

Saaˈooli ba naˈay giidobaa siyidi, Daawita qohennaagau qaalaa geliis. Daawita simmanaadan oottin, i Saaˈoolassi a son kase oottiyoogaadan zaarettidi oottiis. SHin issi gallassi Daawiti diittaa diixxishin, Saaˈooli zaarettidikka ba tooraa Daawitakko xonggiis. Daawiti deshidi aattin, tooray godaa caddiis. Hagee heezzantto! Haˈˈi Daawiti baqatanau bessiyoogaa eriis!

He galla qammi Daawiti ba soo biis. SHin Saa⁠ˈooli amarida asata Daawita woranaadan kiittiis. Miikaala ba aaway ay oottanau qoppidaakko eraasu. Yaatiyo gishshau ba azzinaayyo: ‘Hachchi qammi neeni baqatana xaykko, wontto hayqqaasa’ yaagaasu. He galla qammi Miikaala, Daawiti maskkootiyaara kiyidi baqatanaadan maaddaasu. Saaˈooli bana demmennaadan, Daawiti laappun layttau issisaappe harasan qosettidi deˈiis.