AAˈOOLI zaarettidikka Daawita oyqqanau koyiis. Ba wotaaddaratuppe doorettida 3,000ta ekkidi, Daawita koshshaa kiyiis. Daawiti hegaa siyido wode, Saaˈoolinne a asati qammi awan shemppiyaakko eranau xomoossiya asata kiittiis. Hegaappe Daawiti ba asatuppe naaˈˈata: ‘Intte giddoppe tanaara Saaˈooli deˈiyoosaa baanay oonee?’ yaagidi oychchiis.

Abishaayi: ‘Ta baana’ yaagidi zaariis. Abishaayi Daawita michchee Xaruuyi naˈaa. Saa⁠ˈoolinne a asati xiskkidaashin, Daawitinne Abishaayi leddaara asati shemppidosaa biidosona. Eti Saaˈoola huuphessan deˈiya, a tooraanne haatta gombbuwaa ekkidosona. Eti ubbay xiskkuwan kayro gishshau, ooninne siyibeenna woykko eta beˈibeenna.

Haˈˈi Daawitanne Abishaaya beˈa. Haakki biidi issi deriyaa huuphiyaa saruwan gakkidosona. Daawiti ba qaalaa xoqqu oottidi Israaˈeele olanchchatu halaqaa: ‘Abaneeraa, kawuwaa ne godaa aybissi naagikkii? A tooraynne haatta gombboy awan deˈiyaakko ane xeella!’ yaagiis.

Saaˈooli xiskkuwaappe beegottiis. Hegee Daawita qaalaa gidiyoogaa i eridi: ‘Daawitaa, hegee nenee?’ yaagidi oychchiis. Saaˈoolanne Abaneera ziqqasan deˈiyaageeta beˈay?

Daawiti zaaridi Saaˈoolassi: ‘Ee kawuwau ta godau’ yaagiis. Qassi Daawiti: ‘Ayssi ne tana oyqqanau koyay? Ta ay iitabaa oottidanaa? Kawuwau, ne tooray hageeho. Ne asatuppe issoy yiidi ekko’ yaagiis.

Saaˈooli: ‘Taani mooraas. Taani eeyyabaa hanaas’ yaagiis. Hegaappe Daawiti ba ogiyaa biis; Saaˈoolikka soo simmiis. SHin Daawiti ba wozanan: ‘Issi gallassi Saaˈooli tana worana. Taani Pilisxxeema biitti baqatana koshshees’ yaagidi qoppiis. I oottidoykka hegaadaana. Daawiti Pilisxxeemata cimmidi, i eta bagga gididabadan eti ammananaadan oottiis.

Amarida wodiyaappe guyyiyan, Pilisxxeemati Israaˈeeletuura olettanau kiyidosona. He olan Saaˈoolinne Yonaataani naaˈˈaykka hayqqidosona. Hegan Daawiti keehippe azzaniis. Hegaappe i: ‘Ta ishaa Yonaataanaa, taani neeyyo azzanayis; ne taayyo daroppe alˈˈo!’ yaagi zilaalidoogee deˈiyo issi qarettiya zilaassaa xaafiis.

Hegaappe Daawiti Israaˈeelen deˈiya Kebroona katamaa simmiis. Saaˈoola naˈay Yaabusttee kawotanaadan doorida asatunne Daawiti kawotanaadan koyiya asatu giddon olay denddiis. SHin wurssettan Daawite asay xooniis. Daawiti kawotiyo wode ayyo layttay 30. Laappun layttanne baggaa Kebroonan uttidi haariis. Ayyo yan yelettida attuma naatuppe amaridaageetu sunttay Aminoona, Abeseloomanne Adooniyaa.

Daawitinne a asati Yerusalaame geetettiya loˈˈiya katamaa kiyidi oyqqiyo wodee gakkiis. Daawita michchee Xaruuyi hara naˈay Yooˈaabi he olan sintta xeera gididi olettiis. Hegaa gishshau, Daawiti a ba olanchchatu halaqa oottiis. Haˈˈi Daawiti Yerusalaame kataman uttidi haariyoogaa doommiis.