ILISXXEEMATI zaarettidikka Israaˈeeletuura olettanau yiidosona. He wodiyan Daawita bayra ishanttuppe heezzati Saaˈoola olanchchata gididosona. Yaatiyo gishshau, Isseyi issi gallassi Daawita: ‘Tiyaappenne oyttaa komppuwaappe amaridagaa ekkada ne ishanttussi efa. Eti waani deˈiyaakkonne beˈa’ yaagiis.

Daawiti olanchchati shiiqidosaa gakkidi, ba ishantta koyanau olaa salppiyaa sohuwaa woxxidi biis. Pilisxxeema biitta wogga adussa bitanee Gooliyaadi Israaˈeeleta naassanau kiyiis. I maalladonne omarssi, 40u gallassa ubban hegaadan oottiis. I qaalaa xoqqissidi: ‘Tanaara olettiya issi asa intte giddoppe doorite. I tana xoonidi worikko nuuni intte ashkkara gidana shin, taani a xoonada worikko intte nu ashkkara gidana. Intte tanaara olettiya issi ura dooranadan ta inttena naassayis’ yaagiis.

Daawiti wotaaddaratuppe amaridaageeta: ‘Ha Pilisxxeemiyaa woridi, ha yeellaa Israaˈeelappe qucciya uraassi aybi oosettanee?’ yaagidi oychchiis.

Wotaaddaray: ‘He urau Saaˈooli daro aquwaa immana; qassi ba naˈiyokka assi immana’ yaagiis.

SHin Israaˈeeleti ubbay Gooliyaadi wogga adussa asa gidiyo gishshau, assi yayyidosona. Ayyo geesay 6n wara (heezzu mitire) gidiyaagaa, qassi issi wotaaddaray assi gonddaliyaa tookkees.

Amarida wotaaddarati Kawuwaa Saaˈoolakko biidi, Daawiti Gooliyaadaara olettana koyiyoogaa yootidosona. SHin Saaˈooli Daawitassi: ‘Ha Pilisxxeemiyaara neeni olettana danddayakka. Neeni guutta naˈa; shin i ba deˈo laytta ubban wotaaddara gididi ­deˈiis’ yaagiis. Daawiti zaaridi: ‘Taani ta aawaa dorssata oyqqidi efiya gaammuwaanne beere giyo doˈaa woraas. Ha Pilisxxeemeekka etappe issuwaadan hanana. Yihooway tana maaddana’ yaagiis. Yaatiyo gishshau Saa⁠ˈooli: ‘Ba Yihooway nenaara gido’ yaagiis.

Daawiti shaafaa wodhdhidi ichchashu muyla shuchchata ekkidi, ba qarcciitan yeggiis. Hegaappe, ba yambbarshshaa ekkidi, he wogga adussa bitaniyaara gayttanau biis. Gooliyaadi a beˈido wode, keehippe kariis. Daawita woranaagee a aynne metennabadan qoppiis.

Gooliyaadi: ‘Ane haa shiiqa; taani ne ashuwaa saluwaa kafoynne doˈay maanaadan oottana’ yaagiis. SHin Daawiti: ‘Neeni bisuwaa, tooraanne xinqqaa oyqqada taakko yaasa, shin taani Yihoowa sunttan neekko yayis. Hachchi Yihooway nena ta kushiyan aatti immana; yaatin taani nena worana’ yaagiis.

Hegaappe Daawiti Gooliyaadakko woxxidi biis. Issi shuchchaa qarcciitaappe ekkidi, yambbarshshan wottidi, bau deˈiya wolqqa ubban oliis. SHuchchay sitti gi biidi Gooliyaada somˈˈuwaa caddin, i kunddidi hayqqi bayiis! Pilisxxeemati olan erettida eta bitanee kunddidoogaa beˈidi, ubbay guyye simmidi woxxidosona. Israaˈeeleti eta geeduwaa woxxi yedettidi olan xoonidosona.