OLOMONI kawotiyo wode keehippe yelaga naˈa. I Yihoowa siiqees; qassi a aaway Daawiti a zorido loˈˈo zoriyaakka kaallees. Yihooway Solomonan daro ufayttidi issi qammi aymuwan assi: ‘Solomonaa, ta neeyyo ay immana mala koyay?’ yaagiis.

Yaagin Solomoni: ‘Yihoowau ta Xoossau, taani guutta naˈa gidiyo gishshau waata haaranaakko erikke. Yaatiyo gishshau, ne asaa suure ogiyan haarana mala taayyo adhdhida eratettaa imma’ yaagidi zaariis.

Solomoni oychchidoban Yihooway ufayttiis. Yaatiyo gishshau Yihooway: ‘Neeni duretettaa woy neessi layttay aduqqana mala gidennan, aadhdhida eratettaa oychchido gishshau, neeppe kase deˈida oogaappenna aadhdhiya eratettaa ta neessi immana. Qassi neeni oychchabeenna duretettaanne bonchchuwaakka immana’ yaagiis.

Guutta wodiyaappe guyyiyan, naaˈˈu maccaasati deexo metuwaa ekkidi Solomonakko yiidosona. Etappe issinna: ‘Ha maccaasiyaanne taaninne issi keettan deˈoos. Taani issi attuma naˈaa yelaas; naaˈˈu gallassappe guyyiyan akka attuma naˈaa yelaasu. Hegaappe issi qammi i naˈay hayqqiis. Yaatin, taani xiskkidaashin a ba hayqqida naˈaa ta miyyiyan wottada ta naˈaa baayyo ekkaasu. Taani beegottada hayqqida naˈaa beˈiyo wode, i ta naˈaa gidennaagaa eraas’ yaagada yohuwaa qonccissada yootaasu.

He wode hankko maccaasiyaa: ‘CHii! Paxa deˈiya naˈay taagaa, hayqqidaagee qassi iigaa’ yaagaasu. Koyro maccaasiyaa zaarada: ‘CHii! Hayqqida naˈay neegaa paxa deˈiyaagee qassi taagaa!’ yaagaasu. Maccaasati hegaadan palamettidosona. Solomoni waataneeshsha?

Bisuwaa kiitti ehiissidi: ‘Paxa deˈiya naˈaa naaˈˈussan shaakkidi, etassi baggaa baggaa immite’ yaagiis.

Naˈau tumu aayo gidiyaara: ‘CHii! Hayyanintta naˈaa woranaappe iyyo immite!’ yaagada waassaasu. SHin hinkko maccaasiyaa: ‘Nu naaˈˈaassikka immoppite; naaˈˈussan shaakkite’ yaagaasu.

Wurssettan Solomoni: ‘Naˈaa woroppite! A koyro maccaaseeyyo immite. Naˈaa aayyiyaa o’ yaagiis. Naˈau tumu aayo gidiyaara ba naˈaa keehippe siiqiyo gishshau hayqqiyoogaappe hara maccaaseessi immanau koyidoogan, Solomoni hegaa erana danddayiis. Solomoni merettida metuwaa waati giigissidaakko siydo wode, etau hegaa mala adhdhida eranchcha kawoy deˈiyo gishshau asay ufayttiis.

Solomoni haariyo wode, biittay daro gisttiyaa, banggaa, woyniyaa, balassiyaanne hara kattaa mokkanaadan oottidi, Xoossay asaa anjjiis. Asay loˈˈo maayuwaa maayeesinne loˈˈo keettan deˈees. Oossinne gidi palahida loˈˈobay ubbay deˈees.