EENI hayqqada hayquwaappe denddiyaakko, ne aayeyyo aybi siyttaneeshsha? A keehippe ufayttana! SHin hayqqida asi hayquwaappe denddana danddayii? Hegaa malabi hani erii?

Hagan deˈiya bitaniyaa, maccaasiyoonne guutta naˈaa beˈa. Bitanee hananabaa yootiya Eelaasa. Maccaasiyaa Siraafita kataman deˈiya amˈˈiyo; naˈay qassi i naˈaa. Issi gallassi naˈay sahettiis. Ayyo harggee goobi goobi biin wurssettan hayqqi bayiis. Yaatin Eelaasi maccaasiyo: ‘Naˈaa tayyo hamma’ yaagiis.

Eelaasi hayqqida naˈaa pude pooqiyaa ekki efiidi arssan zinˈˈissiis. Hegaappe: ‘Abeet Yihoowau, ha naˈay hayquwaappe denddanaadan ootta’ yaagidi woossiis. Hegaappe naˈay shemppiyoogaa doommiis! Yaatin Eelaasi naˈaa pooqiyaappe duge wottidi maccaasiyo: ‘Beˈa, ne naˈay paxiis!’ yaagiis. Naˈaa aayyiyaa keehippe ufayttidoy hegaassa.

Yihooway kiittin hananabaa yootiya hara erettida asi Elssaaˈa. I Eelaasa maaddiyaagaa gididi oottiis. SHin takkidi Yihooway maalaalissiyaaba oottanau Elssaaˈakka goˈettiis. Issi gallassi Elssaaˈi baassi daro kehabaa oottida maccaasiyaa deˈiyo SHuneema katamaa biis. Guyyeppe he maccaasiyaa attuma naˈaa yelaasu.

Naˈay diccidi, issi gallassi maallado gaden oottiya ba aawaakko biis. Qoppennan naˈay: ‘Woo ta huuphiyau!’ yaagidi waassiis. Soo efi simmin naˈay hayqqiis. A aayyiyaa ayba azzanadeeshsha! Sohuwaara baada Elsaaˈa ekkada yaasu.

Elssaaˈi yi gakkidi, hayqqida naˈay deˈiyo kifiliyaa geliis. I Yihoowakko woossidi hayqqida naˈaa bolli zinˈˈiis. Sohuwaarakka naˈaa bollay hoˈˈin, naˈay laapputoo hedhdhishiis. Naˈaa aayyiyaa kifiliyaa geliyo wode, i naˈay paxidaagaa beˈada ay keenaa ufayttadeeshsha!

Keehi daro asay hayqqiis. Hegee eta soo asaanne eta laggeta keehippe azzanttiis. Hayqqida asaa denttanau nuuyyo wolqqi baawa. SHin Yihoowayyo he wolqqay deˈees. Takkidi Yihooway daro miilooniyan qoodettiya asaa hayquwaappe deˈuwau waati ehaanaakko tamaarana.