AWUWAA Iyorbbaami hayqqi simmin, huuphessa bagga Israaˈeelen, 10u zaretu kawotettan haarida kawoti ubbay iita. Kawuwaa Akaabi he ubbatuppekka iita kawo. Aybissakko eray? Issi waanna gaaso gididaara a machchiyo, iita Kawiyo Elzzaabeelo.

Elzzaabeela Israaˈeele biitta maccaasa gidukku. A Sidoona biitta kawuwaa naˈiyo. A eeqa xoossaa Baˈaalassi goynnausu; qassi Akaabinne hara daro Israaˈeele asatikka Baˈaalassi goynnanaadan oottaasu. Elzzaabeela Yihoowa ixxausu; hananabaa yootiya a asatuppekka darota woraasu. Harati hayqqennaadan gonggolo giddon qosettidosona. Elzzaabeela issibaa koyikko, ba koyidobaa demmanau asa woranaukka guyye guukku.

Issi gallassi Kawuwaa Akaabi keehippe azzaniis. Yaatin Elzzaabeela a: ‘Neeni hachchi aybissi azzanadii?’ yaagada oychchaasu.

Akaabi: ‘Naabutee taassi giidobaana. Taani a woyniyaa gadiyaa shammana koyaas; shin i taassi bayzzikke yaagiis’ yaagidi zaariis.

Elzzaabeela: ‘Metootoppa; he gadiyaa ta neessi immana’ yaagaasu.

Yaatiyo gishshau, Elzzaabeela he bitanee Naabutee deˈiyo kataman deˈiya halaqatussi dabbadaabbiyaa xaafaasu. A etassi: ‘Naabutee kawuwaanne Xoossaa qanggiis giidi markkattiyaa amarida pattenna asata koyite. Yaatidi Naabuta katamaappe kessidi shuchchan caddi worite’ yaagaasu.

Naabutee hayqqidoogaa Elzzaabeela siyidosaarakka, Akaaba: ‘Haˈˈi baada a woyniyaa gadiyaa ekka’ yaagaasu. Elzaabeela hegaa mala iitabaa oottido gishshau, qaxxayettana bessees yaagikkii?

Hegaa gishshau, guyyeppe Yihooway o qaxxayanau Yeeha giyo bitaniyaa kiittiis. Elzzaabeela Yeehu yiyoogaa siyada ba ayfiyaa tiyetta giigada, ba meraa loyttada Yeeha naagana koyaasu. SHin Yeehu yiidi, Elzzaabeela maskkootiyaara xeelliyaaro beˈidi, kawo keettan deˈiya asata: ‘O duge oli aggite!’ yaagiis. Misiliyan neeni beˈiyoogaadan, asati i giidoogaadan oottidosona. Eti o duge olin, a hayqqa aggaasu. Iita Kawee Elzzaabeeli wurssettay hegaa gidiis.