SAMEELI bitaniyaa huuphiyan zaytiyaa tigiyaagaa beˈa. Issi asi kawo gidanau doorettidoogaa bessanau he wode hegaadan oottoosona. Yihooway, Sameeli Saaˈoola huuphiyan zaytiyaa tiganaadan yootiis. He zaytee keehi sawiya dumma zayte.

Saaˈooli kawo gidanau danddayiyoobadan qoppibeenna. I Sameelayyo: ‘Taani Israaˈeele zare ubbaappe laafiya Biniyaama zare. Yaatin, ayssi neeni tana kawo gidaasa yaagay?’ yaagiis. Saaˈooli gitanne erettida asa malatanau koyibeenna gishshau Yihooway a dosiis. Kawo gidanaadan Yihooway a dooridoykka hegaassa.

SHin Saaˈooli hiyyeesa woy guutta asa gidenna. Eta soo asay dure; ikka qassi malanchchanne adussa asa. I Israaˈeelen deˈiya ooppenne geesaa aduqees! Saaˈooli keehippe minonne wottankka gattenna asa. Yihooway Saaˈoola kawo oottidi doorido gishshau asay ufayttiis. Eti ubbay qaalaa xoqqu oottidi: ‘Kawoy daro wodiya deˈo!’ yaagiyoogaa doommidosona.

Israaˈeeletu morkketi audeegaappenne aaruwaa minnidosona. Eti haˈˈikka Israaˈeeletu bolli daro metuwa gattiiddi deˈoosona. Saaˈooli kawo gididi gamˈˈennan, Amoonati etaara olettanau yiidosona. SHin Saaˈoli daro olanchchata shiishshidi, Amoonata xooniis. Hegee, Saaˈooli kawo gididoogan asay ufayttanaadan oottiis.

Layttaappe layttay aadhdhi aadhdhi biyo wode, Saaˈooli Israaˈeeleta kaalettin, eti bantta morkketa darotoo xoonidosona. Saaˈoolassi Yonaataana geetettiyaa issi xala naˈay deˈees. Yonaataanikka Israaˈeeleti daro olan xoonanaadan maaddiis. Pilisxxeemati he wodekka Israaˈeeletu morkketu ubbaappe iittidaageeta. Issi gallassi daro shaˈan qoodettiya Pilisxxeemati Israaˈeeletuura olettanau kiyidosona.

Sameeli, Yihoowassi yarshshuwa woykko imotaa i yiidi shiishshana gakkanaashin naaganaadan Saaˈoolassi yootiis. SHin Sameeli elle yibeenna. Pilisxxeemati olaa doommoosona gi yayyidi, Saaˈooli kasetidi yarshshuwaa shiishshiis. Sameeli wurssettan yiidi, Saaˈooli azazettibeennaagaa assi yootiis. Sameeli: ‘Yihooway Israaˈeeleta haariya hara kawuwaa doorana’ yaagiis.

Takkidi Saaˈooli haranttuwaakka azazettennan aggiis. Yaatiyo gishshau Sameeli ayyo: ‘Yihoowayyo azazettiyoogee modhdho dorssaa imootaa immiyoogaappe aadhdhees. Neeni Yihoowayyo azazettennan ixxido gishshau, neeni Israaˈeele kawo gidada deˈanaadan Yihooway koyenna’ yaagiis.

Nuuni hagaappe loˈˈo timirttiyaa demmana danddayoos. Ubbatoo Yihoowayyo azazettiyoogee ay keena koshshiyaabakko bessees. Saaˈooladan loˈˈo asa gidida urikka, laamettidi iita asa gidana danddayiyoogaakka bessees. Iita gidanau nuuni mulekka koyokko; koyiyooyye?