A GUUTTA naˈiyaa woygaydda deˈiyaakko eray? A Yihooway kiittin hananabaa yootiya Elssaaˈi, Yihooway maaddin oottiyo maalaalissiyaabata ha maccaaseessi yootaydda deˈausu. Maccaasiyaa Israaˈeele asa gidenna gishshau, Yihoowabaa erukku. Yaatin, naˈiyaa ayssi macaasee soo baadee? Ane beˈoos.

Maccaasiyaa Sooriyaa biitta asa. I keettaaway Sooriyaa olanchchatu halaqaa Naaˈimaana. Sooreti ha guutta Israaˈeele biitta naˈiyo omooddi ehiidi, Naaˈimaana machchee ashkkara gidanaadan issi immidosona.

Naaˈimaana issi iita goga harggee oyqqiis. Ha harggee issi asa bollaappe ashoy duuxxi duuxxi wodhdhanaadankka oottana danddayees. Hegaa gishshau, naˈiyaa Naaˈimaana maccaaseessi: ‘Ta goday Israaˈeelen deˈiya hananabaa yootiya Yihoowa asakko biyakko loˈˈo. I ha harggiyaappe a pattanashin’ yaagada yootaasu. Takkidi maccaasee azinay hegaa siyiis.

Naaˈimaani paxanau keehippe koyido gishshau, Israaˈeele biitti baanau qofaa qachchiis. I yaa gakkidi Elssaaˈa soo biis. Elssaaˈi ba ashkkaray kare kiyidi, Naaˈimaanayyo Yorddaanoosa SHaafaa biidi, laapputoo meecettana mala yootanaadan oottiis. Naaˈimaani hegan keehippe yiillotidi: ‘Ta biittan deˈiya shaafati Israaˈeelen deˈiya ay shaafaappenne keha!’ yaagiis. Naaˈimaani hegaadan gi simmidi, bi aggiis.

SHin a ashkkaratuppe issoy assi: ‘Ta godau, Elssaaˈi neeyyo deexxiyaaba yootiyakkokka neeni oottana. Yaatin i giidoogaadan neeni aybissi meecettikkii?’ yaagiis. Naaˈimaani ba ashkkaray giidoogaa siyi biidi, Yorddaanoosa SHaafan laapputoo muukettiis. I hegaadan oottin, a bollay minnidi paxi aggiis!

Naaˈimaani keehippe ufayttiis. I Elssaaˈakko simmi biidi ayyo: ‘Saˈa ubban tumu Xoossay Israaˈeele Xoossaa xalaala gidiyoogaa taani haˈˈi eraas. Hegaa gishshau, hayyana ta immiyo ha imotaa ekkarkkii’ yaagiis. SHin Elssaaˈi zaaridi: ‘CHii, taani ekkikke’ yaagiis. Naaˈimaana pattiday Yihoowa gidiyo gishshau, imotaa bau ekkiyoogee bala gidiyoogaa Elssaaˈi erees. SHin Elssaaˈa ashkkaray Gehaazi he imotaa bau ekkanau koyiis.

Yaatiyo gishshau, Gehaazi kaallidi deˈiyaagaadan oottiis. Naaˈimaani bi simmin, Gehaazi a gakkanau geeduwaa woxxiis. Gehaazi: ‘Elssaaˈi bana oychchanau haˈˈi yiida laggetuyyo ne imotaappe immana koyidi, neeyyo yootanaadan tana kiittiis’ yaagiis. Hegee worddo. SHin Naaˈimaani hegee worddo gidiyoogaa erenna gishshau, Gehaazassi amaridabaa immiis.

Gehaazi soo simmido wode, i ay oottidaakko Elssaaˈi eriis. Assi Yihooway yootiis. Yaatiyo gishshau i: ‘Neeni ha iitabaa oottido gishshau, Naa⁠ˈimaana oyqqida goga harggee nena oyqqana’ yaagiis. Sohuwaarakka he harggee a oyqqi aggiis.

Ha ubbabaappe nuuni ay tamaarana danddayiyoo? Koyruwan, he guutta naˈeegaadan Yihoowabaa yootana bessiyoogaa tamaaroos. Hegee daro loˈˈobaa oottana danddayees. Naaˈˈanttuwan, koyro Naaˈimaani hanidoogaadan otorettana bessenna; hegaappe Xoossaassi oottiyaageetussi azazettana koshshees. Heezzanttuwan, Gehaazaagaadan worddotana koshshenna. Geeshsha Maxaafaa nabbabiyoogan darobaa tamaarana danddayokkoo?