AGEE gannatiyaa misiliyaa; Xoossay hananabaa yootiya Isiyaasassi geella hagaa milatiyaagaa bessennan aggenna. Isiyaasi deˈidoy Yoonaasi deˈido wodiyaappe guuttaa takkiina.

Gannatee “ataakiltte sohuwaa” yaagiyoogaa. Hagee nuuni ha maxaafan beˈidi aadhdhido issibaa neeni hassayanaadan oottidee? Xoossaa Yihooway Addaameyyonne Hewaaniyyo giigissido loˈˈo ataakiltte sohuwaa milatees; milatennee? SHin kumetta saˈay gannate gidana wodee deˈii?

Xoossaa asaassi sinttappe yaana ooratta gannatiyaabaa xaafanaadan, Yihooway hananabaa yootiya Isiyaasassi yootiis. I hagaadan yaagiis: ‘Wanggireelloy dorssa maraara issippe saruwan deˈana. Gaammuwaa maraynne miizzaa maray issippe maana; etakka guutta naˈay heemmana. Xammiya naˈay woriya shooshshaa matan kaaˈiyaakkokka qohettenna’ yaagiis.

Daroti: ‘Hagee mule hanana danddayenna. Saˈan metoy xayi erenna; sinttanaukka xayenna’ yaagana danddayoosona. SHin ane issibaa qoppa: Xoossay Addaameenne Hewaana deˈanaadan etau ay mala sohuwaa immidee?

Xoossay Addaamanne Hewaano gannatiyan wottiis. Eti bantta deˈiyo loˈˈiya sohuwaa digettidoy, ceeggidoynne hayqqidoy, Xoossaayyo azazettibeenna gishshataassa. Xoossay bana siiqiya asaassi Addaameppenne Hewaanippe halidabata immanau qaalaa geliis.

Sinttappe yaana ooratta gannatiyan qohuwaanne bashshaa kaalettiya aybinne deˈenna. Yan kumetta sarotettay deˈana. Ubba asay payyatettaaninne ufayssan deˈana. He gannatee Xoossay koyro doomettan qoppidoogaa mala gidana. SHin Xoossay hegaa waati polanaakko, deˈishiiddi tamaarana.