A BITANEE Yihoowakko woossiyoy aybissakko eray? I ha dabddaabbeta Yihoowassi yarshshiyoosaa sinttan miccidoy aybissee? He bitanee Hizqqiyaasa. I tohossa Israaˈeele naaˈˈu zaretu kawo. I haˈˈi daro metuwan deˈees. Aybissi?

Asooretu olanchchati huuphessa bagga Israaˈeele 10u zareta xayssidosona. Eti keehippe iita gidido gishshau hegaa Yihooway diggibeenna. Haˈˈi qassi Asooretu olanchchati naaˈˈu zaretu kawotettaara olettanau yi uttidosona. Hizqqiyaasa qofissidabay hegaa.

Asoore biittaa kawoy, Kawuwaa Hizqqiyaasassi dabddaabbiyaa kiittiis. Hizqqiyaasi Xoossaa sinttan miccidoy he dabddaabbeta. Dabddaabbeti Yihoowa qilliccidobatanne, Hizqqiyaasi hidoota qanxxanaadan giidi xaafidobata. Hizqqiyaasi: ‘Abeet Yihoowau, Asoore kawuwaa kushiyaappe nuna ashsha. Hegaappe dere ubbay neeni tumu Xoossa gidiyoogaa erana’ yaagidi woossidoy hegaassa. Yihooway Hizqqiyaasa woosaa siyanee?

Hizqqiyaasi loˈˈo kawo. I Israaˈeele 10u zaretu kawotettaa iita kawotu mala woykko ba iita aawaa Kawuwaa Akaaza mala gidenna. Hizqqiyaasi Yihoowa higgiyaa ubbaa akeekan azazettiis. Yaatiyo gishshau, Hizqqiyaasi woosaa wurssi simmin, hananabaa yootiya Isiyaasi: ‘Asoore kawoy Yerusalaame yeenna. A wotaaddaratuppe issoynne Yerusalaamekko matenna. Eti katamaakko issi zubiyaanne yeddokkona’ yaagiya Yihoowappe siyido kiitaa akko kiittiis.

Hagan deˈiya misiliyaa xeella. Ha hayqqida wotaaddarati ubbay oonakko eray? Eti Asooreta. Yihooway ba kiitanchchaa kiittin, he kiitanchchay issi qamman 185,000u Asooretu wotaaddarata woriis. Yaatiyo gishshau, Asooretu kawoy hidootaa qanxxidi ba biitti simmiis.

Naaˈˈu zaretu kawotettay attiis; hegaappe asay guutta wodiyau saruwan deˈiis. SHin Hizqqiyaasi hayqqi simmin a naˈay Minaasee kawotiis. Minaaseenne appe simmidi kawotida a naˈay Amooni, naaˈˈaykka keehippe iita kawota. Yaatiyo gishshau, biittay zaarettidikka danuwaaninne makkalan kumiis. Kawuwaa Amoona a ashkkarati worin, a naˈay Yoosiyaasi naaˈˈu zaretu kawotettan kawo gidiis.