SAY ha yelaga bitaniyaa qillicciyaaga beˈa. I oonakko eray? Hegee Ermaasa. I keehi erettida hananabaa yootiya Xoossaa asa.

Kawuwaa Yoosiyaasi eeqaa biittaappe xayssi simmin daronne gamˈˈennan, Ermaasi hananabaa yootiyaagaa gidanaadan Yihooway assi yootiis. Gidikkonne, Ermmaasi hananabaa yootanau bana keehippe guutta naˈa giidi qoppiis. SHin Yihooway a maaddanaagaa yootiis.

Ermmaasi Israaˈeeleti iitabaa oottiyoogaa agganaadan yootiis. I: ‘Israaˈeele gidenna asay goynniyoy eeqatussa’ yaagiis. SHin daro Israaˈeeleti tumu Xoossaa Yihoowaassi goynniyoogaappe eeqau goynnoosona. Eramaasi eta iitatettaa gishshau Xoossay eta qaxxayanaagaa yootido wode, eti a bollan miiccidosona.

Daro layttay aadhdhiis. Yoosiyaasi hayqqin, heezzu aginay aadhdhi simmin a naˈay Yoˈaqeemi kawotiis. Ermaasi asaassi zaari zaaridi: ‘Intte intte iita oosuwaa aggana xayikko, Yerusalaamee xayana’ yaagiis. Qeeseti Ermmaasa oyqqidi: ‘Neeni hagaa giido gishshau hayqqana koshshees’ yaagidi qaalaa xoqqissidi haasayidosona. Hegaappe Israaˈeele biittaa daannatuyyo: ‘Ermaasi nu katamay xayees giidi yootido gishshau, i hayqqana bessees’ yaagidosona.

Ermaasi haˈˈi ay oottanau deˈii? I yayyibeenna! I eta ubbaayyo: ‘Tana Yihooway intteyyo hagaa yootanaadan kiittiis. Intte intte iita oosuwaa aggana xaykko, Yihooway Yerusalaame xayssana. SHin: ‘Intte tana woriyaabaa gidikko, bali baynna asa woriyoogaa erite’ yaagiis.

Daannati Ermmaasa woribookkona shin, Israaˈeeleti bantta iita oosuwaa aggibookkona. Takkidi Baabiloone kawoy Naabukadanaxoori yiidi, Yerusalaame oliis. Wurssettan Naabukadanxoori Israaˈeeleta ba ashkkarata oottiis. I daro shaˈan qoodettiyaageeta Baabiloone ekki efiis. Ne erenna asay nena ne deˈiyo heeraappe ne erenna biitti efiyaakko neessi aybi siyettanaakko ane qoppa!