KAWUWAA Naabukadanaxoori xoqqa timirttiyaa tamaarida Israa⁠ˈeeleta ubbaa Baabiloone efoosappe 10u layttappe dariyaagee aadhdhiis. Haˈˈi aybi haniiddi deˈiyaakko beˈa! Yerusalaamee taman xuugettiiddi deˈees. Hayquwaappe attida Israaˈeeleti qassi qashuwau Baabiloonee biiddi deˈoosona.

Asay bantta iita ogiyaappe simmana xaykko, hananabaa yootiya Yihoowa asati gakkana giidoobay hagaa gidiyoogaa akeeka. SHin Israa⁠ˈeeleti hananabaa yootiyaageeti giidobaa siyibookkona. Eti Yihoowa aggidi eeqatussi goynniyoogaa aggibookkona. Yaatiyo gishshau, asay qaxxayettana bessees. Hegaa nuuni erana danddayidoy, Xoossay kiittin hananabaa yootiya Hizqqeeli Israaˈeeleti he wode oottiyo iitabaa yootido gishshataassa.

Hizqqeeli oonakko eray? Yerusalaame gakkida ha wolqqaama bashshaappe 10u layttaa kasetidi, Kawuwaa Naabukadanaxoori Baabiloone efiido yelaga naatuppe i issuwaa. Daaneelinne a heezzu laggeti Sidiraaqi, Misaaqinne Abddanaagoy Baabiloone biidoy aara issi wodiyaana.

Hizqqeeli Baabiloonen deˈiyaaba gidikkokka, Yihooway Yerusalaamen deˈiya beeta maqidasiyan ayba iitabay hanettiiddi deˈiyaakko a bessiis. Yihooway hegaa oottidoy maalaalissiyaa ogiyaana. Hizqqeeli Baabiloonen deˈiyoogee qoncce; shin Yihooway beeta maqidasiyan hanettiiddi deˈiyaabaa ubbabaa a bessiis. Hizqqeeli beˈidobay keehippe daganttiyaaba!

Yihooway Hizqqeelayyo: ‘Asay ha beeta maqidasiyan oottiyo sheneyiyaabaa beˈa. SHooshshatunne hara doˈatu misiliyan goday kumidaagaa beˈa. Israaˈeeleti qassi etassi goynniyaageeta beˈa!’ yaagiis. Hizqqeeli he ubbabaa beˈiisinne hanettiyaabaa ubbaa xaafiis.

Yihooway Hizqqeela: ‘Israaˈeele asaa kaalettiyaageeti geeman ay oottiyaakko beˈay?’ yaagidi oychchiis. Ee, i hegaakka beˈiis. Hegan 70u attuma asay deˈees; eti ubbaykka eeqatuyyo goynniiddi deˈoosona. Eti: ‘Yihooway nuna beˈenna. I ha biittaa aggiis’ yaagoosona.

Hegaappe Yihooway beeta maqidasiyau huuphessa bagga penggiyan deˈiya amarida maccaasata Hizqqeela bessiis. Eti yan uttidi eeqa xoossaa Tamuuzayyo goynnoosona. Yihoowa beeta maqidasiyaa geliyoosan deˈiya he attuma asatakka beˈa! Eta qooday 25 gidana. Hizqqeeli eta ­beˈiis. Eti away kiyiyo baggi simmidi awaassi goynnoosona!

Yihooway: ‘Ha asati tana bonchchokkona. Eti iitabaa oottiyoogaa xalla gidennan, yiidi hegaa ta beeta maqidase giddon oottoosona!’ yaagiis. Hegaa gishshau, Yihooway: ‘Eti ta suulo hanqquwaa beˈana. Taanikka eti xayiyo wode qarettikke’ yaagidi caaqqiis.

Israaˈeeleti Kawuwaa Naabukadanaxoora bolli makkalidoy, Yihooway Hizqqeelassi hagaa bessi simmin, mexi heezzu laytta gidiyaagee aadhdhiina. Yaatin, i etaara olettanau biis. Issi layttanne baggaappe guyyiyan, Baabilooneti Yerusalaame dirssaa gimbbiyaa mentti gelidi katamaa taman xuuggi xayssidosona. Asaappe dariyaagee woy hayqqiis woy omooddettidi Baabiloone biis.

Israaˈeeletu bolli hagaa mala iita bashshay gakkanaadan Yihooway oottidoy aybissee? Ee, eti Yihoowa siyibeennanne a higgiyaukka azazettibeenna gishshataassa. Hagee, nuuni oottanaadan Xoossay odiyobaa ubbatoo oottiyoogee ay keena koshshiyaabakko bessees.

Koyro heeran Israaˈeele biittan deˈanaadan wottido asati keehi guutta. Kawuwaa Naabukadanaxoori Gadaaliyaa geetettiya issi Ayhuda bitaniyaa he asatu bolli sunttiis. SHin amarida Israaˈeeleti Gadaaliyaa woridosona. Haˈˈi asay hegaa mala iitabay hanido gishshau, Baabilooneti yiidi banttana ubbaa xayssoosona yaagidi yayyidosona. Yaatiyo gishshau, eti wolqqan Ermmaasakka banttanaara ekkidi Gibxxe betidosona.

Hegaappe denddidaagan, Israaˈeele biittay ay asinne baynnasa gidiis. He biittan 70u layttau ayba asinne deˈibeenna. Biittay muleera asi baynnasa kiyiis. SHin Yihooway 70u layttappe guyyiyan, ba asaa zaaridi he biitti ehaanau qaalaa geliis. Hegee hegaadan deˈishin, Baabiloone biitti efiido Xoossaa asay yan waaniiddi deˈiyoonaa? Ane beˈoos.