A ASATI oonakkonne eti ay oottiiddi deˈiyaakko eray? Eti olau biiddi deˈoosona; sinttaara deˈiyaageeti qassi mazamuriyaa yexxiiddi deˈoosona. SHin neeni: ‘Ha yexxiya asati olettanau aybissi tooraanne bisuwaa oyqqibookkonaa?’ yaagada oychchana danddayaasa. Aybissakko ane beˈoos.

Yoosaafixi Israaˈeele naaˈˈu zaretu kawotettaa kawo. I deˈidoy huuphessa bagga 10u zaretu kawotettan Kawuwaa Akaabinne Elzzaabeela deˈido wodiyaana. SHin Yoosaafixi loˈˈo kawo; qassi a aawaa Asikka loˈˈo kawo. Hegaa gishshau, tohossa bagga naaˈˈu zaretu kawtettaa asay daro layttaassi loˈˈo deˈuwaa deˈiis.

SHin haˈˈi asay yayyanaadan oottiyaa issibi merettiis. Kiitaa ehiida asati Yoosaafixassi: ‘Seyra Deriyaappe, Amoonappenne Moˈaabappe daro olanchchati nena olanau yoosona’ yaagidi yootidosona. Yihoowa maaduwaa koyidi, daro Israaˈeeleti Yerusalaame shiiqidosona. Eti beeta maqidasiyaa bin, Yoosaafixi: ‘Abeet nu Xoossau Yihoowau, nuuni ay oottanaakko erokko. Ha daro qooday deˈiyo olanchchatuura olettanau nuussi wolqqi baawa. Nuuni maaduwaa demmanau neekko xeelloos’ yaagidi woossiis.

Yihooway siyidi ba ashkkaratuppe issoy asaayyo: ‘Olay Xoossaabaappe attin, inttebaa gidenna. Intte olettana koshshenna. Yihooway inttena waatidi ashshanaakko coˈˈu giidi xeellite’ yaagidi yootanaadan oottiis.

Yaatiyo gishshau, wonttetta gallassi maallado Yosaafixi asaassi: ‘Yihoowan ammanettite!’ yaagiis. Yaatidi, mazamuriyaa yexxiya asata ba wotaaddaratuppe sinttan salppissidi, eti hemettiiddi Yihoowassi saba mazamuriyaa yexxanaadan oottiis. Eti olaa sohuwaa matiyo wode aybi hanidaakko eray? Yihooway eta morkke wotaaddarati issoy issuwaara olettanaadan oottiis. Israaˈeeleti yaa gakkiyo wode, eta morkke wotaaddarati ubbay hayqqiichchidosona!

Yihoowan ammanettidi, Yoosaafixi eranchcha gidennee? Nuunikka An ammanettikko, eranchcha gidana.