HEGEE saˈan zinˈˈiday oonakko eray? Hegee Saaˈoola. I Isxxifaanoosa shuchchan caddida asatu maayuwaa naagidaagaa gidiyoogaa hassaya. He wagagga pooˈuwaa xeella! Aybi haniiddi deˈii?

Isxxifaanoosi hayqqi simmin, Yesuusa kaalliyaageeta yedettiyoogan Saaˈooli sintta xeera gidiis. I issi keettaappe hara keettaa bi biidi, eta goochchi kessidi qasho keetti yeggees. Erissiyo ashkkaratuppe daroti hara katamata baqatidi, yan “mishiraachchuwaa” sabbakiyoogaa doommidosona. SHin Saaˈooli Yesuusa kaalliyaageeta koyanau hara katamata biis. Haˈˈi i Damasqqo biiddi ogiyan deˈees. SHin kaallidi deˈiya garamissiyaabi oge bolli haniis:

Qoppennan pooˈoy saluwaappe Saaˈoola yuushuwan pooˈiis. Hagan nuuni beˈiyoogaadan, i saˈan kunddiis. Hegaappe: ‘Saaˈoolaa, Saaˈoolaa! tana ayssi qohay?’ yaagiyaa issi qaalay siyettiis. Saaˈoolaara deˈiya asati pooˈuwaa beˈidosonanne cenggurssaakka siyidosona, shin haasayay ay giyabaakkonne shaakkibookkona.

Saaˈooli: ‘Godau, neeni oonee?’ yaagidi oychchiis.

He qaalay: ‘Taani ne qohiyo Yesuusa’ yaagiis. Yesuusi hegaadan giidoy Saaˈooli Yesuusa kaalliyaageeta qohiyo wode, Yesuusassi he qohoy bana gakkidabadan siyettiyo gishshataassa.

Saaˈooli haˈˈi: ‘Godau, taani ay oottana mala koyay?’ yaagidi oychchiis.

Yesuusi: ‘Denddada Damasqqo ba. Neeni oottanabi neeyyo yan odettana’ yaagiis. Saaˈooli denddi eqqidi ba ayfiyaa dooyiyo wode, aynne xeellana danddaybeenna. I qooqiichchiis! Yaatiyo gishshau, aara deˈiya asati, a kushiyaa oyqqi kaalettidi Damasqqo efiidosona.

Yesuusi Damasqqon deˈiya ba erissiyo ashkkaratuppe issuwaassi: ‘Hanaaniyau, dendda. Suure giyo ogiyaa baada Yihudaa son Saaˈoola giyo asa oychcha. I taassi dumma oosanchcha gidanaadan taani a dooraas’ yaagiis.

Hanaanee azazettiis. I Saaˈoolaara gayttido wode, a bolli ba kushiyaa wottidi: ‘Goday, neeni zaarettada xeellana malanne geeshsha ayyaanay nenan kumana mala, tana kiittiis’ yaagiis. Sohuwaarakka aybakko poqo malay Saaˈoola ayfiyaappe wodhdhin, i zaarettidi xeellana danddayiis.

Saaˈooli Ayhuda gidenna daro asau sabbakiyoogan keehippe goˈˈiya asa gidiis. I kiitettida PHauloosa gidiis; abaa darobaa tamaarana deˈoos. SHin koyro, Xoossay PHeexiroosa ay oottanaadan kiittidaakko ane beˈoos.