PHAULOOSI sanssalatan qashettidoogaanne Roome wotaaddaray a naagiyaagaa beˈa. PHauloosi Roomen qashuwan deˈees. I, Rooma Kawoy Qeesaari pirddana gakkaanashin naagiiddi deˈees. I qashuwan deˈiyo wode, asay a oychchennaadan digettibeenna.

PHauloosi Roome gelido heezzantto gallassi, Ayhudatu halaqati amaridaageeti banaara yiidi gayttana mala etau kiittiis. Hegaa gishshau, Roomen deˈiya daro Ayhudati akko yiidosona. PHauloosi etassi Yesuusabaanne Xoossaa kawotettaabaa sabbakiis. Amaridaageeti ammanidi Kiristtaane gididosona; shin harati ammanibookkona.

PHauloosi bana naagiya dumma dumma wotaaddaratussikka sabbakiis. PHauloosi qashettidi takkido naaˈˈu laytta wodiyan demmido asa ubbau sabbakiis. Hegaappe denddidaagan, Qeesaara soo asay attennan Kawotettaa mishiraachchuwaa siyidi, etappe amaridaageeti Kiristtaane gididoosona.

SHin a oychchanau yiidi, uttidi xaafiyaagee hagee oonee? Malana danddayay? Ee, i Ximootiyoosa. Kawotettaabaa sabbakido gishshau, Ximootiyoosikka qashettiis; shin i qashuwaappe birshshettiis. Hagau i PHauloosa maaddanau yiis. Ximootiyoosi ay xaafiiddi deˈiyaakko eray? Ane beˈoos.

Taarike 110n deˈiya Piliphphisiyuusanne Efisoona katamata hassayay? PHauloosi he katamatun Kiristtaane gubaaˈeti eqqanaadn maaddiis. PHauloosi qashuwan deˈiiddi, he Kiristtaanetussi dabddaabbiyaa xaafiis. He dabddaabbeti Geeshsha Maxaafaa giddon deˈoosona; eti Efisoonanne Piliphphisiyuusa geetettoosona. PHauloosi Piliphphisiyuusan deˈiya bantta Kiristtaane laggetussi Ximootiyoosi xaafanabaa yootiiddi deˈees.

Piliphphisiyuusan deˈiya asati PHauloosayyo daro kehidosona. Eti PHauloosi hagan qashuwan deˈishin assi imotaa kiittin, PHauloosi hegaassi eta galattiiddi deˈees. He imotaa ehiidaagee Eppafiroditoosa. SHin i keehippe sahettidi hayqqiichchidi attiis. Hegaappe ayyo kehin paxidi, soo simmanau giigiis. I Piliphphisiyuusa simmi biyo wode, PHauloosinne Ximootiyoosi kiittiyo ha dabddabbiyaa etassi efaana.

PHauloosi qasho keettan deˈiiddi, Geeshsha Maxaafan deˈiya hara naaˈˈu dabddaabbeta xaafiis. Issoy Qolasiyaasan deˈiya Kiristtaanetussi xaafidoogaa. I ayba geetetti xeegettiyaakko eray? Qolasiyaasa geetettees. Naaˈˈanttoy qassi, Qolasiyaasan deˈiya ba mata laggiyaa Pilimoonassi xaafidoogaa. He dabddaabbee Pilimoona ashkkaraa Anaasimoosabaa xeelliyaagaa.

Anaasimoosi Pilimoonappe baqatidi Roome biis. PHauloosi yan qashuwan deˈiyoogaa Anaasimoosi auppekko siyiis. Anaasimoosi bana oychchanau yin, PHauloosi ayyo sabbakiis. Anaasimoosikka takkennan Kiristtaane gidiis. Anaasimoosi baqatido gishshau, haˈˈi azzaniis. Yaatiyo gishshau, PHauloosi ha dabddaabbiyan Pilimoonassi ay xaafiyakko eray?

PHauloosi, Anaasimoosayyo atto gaanaadan Pilimoona oychchiis. PHauloosi: ‘Taani a neekko zaarada yeddayis. SHin i haˈˈi neessi ashkkara xalla gidennan, loˈˈo Kiristtaane isha’ yaagidi xaafiis. Anaasimoosi Qolasiyaasa simmidi biyo wode, ha naaˈˈu dabddaabbeta ekkidi biis; issuwaa Qolasiyaasa asau haraa qassi Pilimoonassi efiis. Pilimooni ba ashkkaray Kiristtaane gididoogaa eridi, ay keena ufayttidaakko qoppana danddayoos.

PHauloosi Piliphphisiyuusa asaassinne Pilimoonassi xaafiyo wode, i etassi yootiyo mishiraachchoykka deˈees. PHauloosi Piliphphisiyuusa asaassi: ‘Taani Ximootiyoosa sohuwaara inttekko yeddana. SHin taanikka mata wode inttekko baana’ yaagiis. Qassi Pilimoonayyo i: ‘Ne matan taani shemppanasaa taayyo giigissa’ yaagiis.

PHauloosi birshshettidi, darosan deˈiya ba Kiristtaane ishatanne michchota oychchiis. SHin takkidi PHauloosi naaˈˈanttuwaakka Roomen qashettiis. He wodiyan eti a woranaagaa eriis. Hegaa gishshau, Ximootiyoosi baakko eesuwan yaanaadan dabddaabbiyaa xafiis. PHauloosi: ‘Taani Xoossassi ammanettaas; qassi Xoossaykka taayyo woyituwaa immana’ yaagiis. PHauloosa woridoogaappe guutta layttaa takkidi, Yerusalaamee naaˈˈanttuwaakka xayiis; he wode xayidoy Roometuuna.

SHin Geeshsha Maxaafan hara darobi deˈees. Xoossaa Yihooway, kiitettida Yohaannisi Ajjuutaa maxaafaa gujjin, Geeshsha Maxaafaa wurssetta maxaafata xaafanaadan oottiis. Geeshsha Maxaafaa giddon deˈiya he maxaafay sinttanaabaa yootees. Sinttaara yiya wodee ay oyqqidaakko ane haˈˈi tamaarana.