POORA mati! La aybi kiyidee? Ha saˈan zinˈˈida naˈay keehippe qohettideeshsha? Beˈa! sooppe kiyiiddi deˈiya asatuppe issoy PHauloosa! Ximootiyoosakka hegan beˈay? Naˈay maskkootiyaappe kunddideeyye?

Ee, hanidabay hegaa. PHauloosi hagan Xiroˈaadan deˈiya erissiyo ashkkatussi qaalaa yootiiddi deˈees. I wonttetta gallassi markkabiyan baana koshshiyo gishshau, adussa wodiyaassi eta beˈennaagaa eriis. Yaatiyo gishshau, i qaalaa yootiiddi qammaappe usuppun saate gakkanaashin takkiis.

Euxikoosa geetettiya ha naˈay maskkootiyaa bolli uttosan xiskkiis. I heezzantta pooqiyaappe duge saˈan maskkootiyaara kare kunddiis! Yaatiyo gishshau, asay hegaa keenaa ayssi dagammidaakko haˈˈi erana danddayaasa. Asay naˈaa denttiyo wode, eti hirggidoogaadan haniis. Naˈay hayqqiis!

PHauloosi naˈay hayqqidoogaa eridi a bolli zinˈˈidi, a qoommiis. Hegaappe i: ‘Hirggoppite; aykko baawa; i saro!’ yaagiis. Ee, naˈay saro! Hegee maalaalissiyaaba! PHauloosi a hayquwaappe denttiis! Asay ubbay ufayssan poocu giis.

Eti ubbay simmidi pooqiyaa pude kiyidi qumaa miidosona. PHauloosi wonttana gakkanaashin qaalaa yootiiddi takkiis. SHin Euxikoosi simmidi xiskkibeennaagaa siree baynnan erana danddayaasa! Hegaappe PHauloosi, Ximootiyoosinne etaara biyaageeti markkabiyan gelidosona. Eti au biiddi deˈiyaakko eray?

PHauloosi ba heezzantto sabbakuwaa hemetaa biron wurssidi soo simmiiddi deˈees. Ha hemetan PHauloosi Efisoona katamaa xallan heezzu laytti uttiis. Yaatiyo gishshau, ha hemetay a naaˈˈantto hemetaappekka aduqqees.

Markkabee Xiroˈaadappe denddi biidi, Miliixen guutta wodiyaassi shemppiis. He sohuwaappe Efisooni guutta kilo meetiriyaa haakkiyo gishshau, PHauloosi gubaaˈiya cimati wurssetta wodiyau banaara gayttidi haasayanaadan, Miliixe yana mala etau kiitaa yeddiis. Hegaappe guyyiyan, markkabee biyo saate gakkin, PHauloosi biyoogaa beˈidi, eti ay keena azzanidonaashsha!

Markkabee wurssettan Qiisaariyaa simmiis. PHauloosi yan Piliphphoosa giyo erissiyo ashkkaraa son shemppidaashin, Agaaboosa giyo hananabaa yootiya bitanee, PHauloosa naagettanaadan zoriis. I, PHauloosi Yerusalaame biyo wode qashettanaagaa yootiis. Hanidabaykka tumuppe hegaa. Hegaappe, PHauloosi naaˈˈu layttaa Qiisaariyan qashettoogaappe guyyiyan, Roome haariya Qeesaara sinttan shilootan eqqanau Roome kiitettiis. I Roome biishin, aybi hanidaakko ane beˈoos.