HA MACCAASIYAANNE ha naaˈˈu attuma asati oonakko eray? Maccaasiyaa Yesuusa kaalliya, Magddala Mayraamo. Bootta maayuwaa maayida asati qassi kiitanchchata. Mayraama a giddo xeelliyo he guutta kifilee Yesuusi hayqqin a ahaa wottido sohuwaa. He sohoy duufuwaa geetettees. SHin haˈˈi a ahay baawa! Oone efiiday? Ane beˈoos.

Yesuusi hayqqoogaappe guyyiyan qeeseti PHilaaxoosassi: ‘Yesuusi paxa deˈiiddi, i heezzu gallassappe guyyiyan denddanaagaa yootiis. Yaatiyo gishshau, duufoy naagettanaadan azaza. Yaatikko a erissiyo ashkkarati a ahaa wuuqqidi, i hayquwaappe denddidobadan haasayana danddayokkona!’ yaagidosona. PHilaaxoosi duufauwaa naagissanau wotaaddarata kiittanaadan qeesetussi yootiis.

SHin Yesuusi hayqqido heezzantto gallassi wonttimaattan, qoppennan Yihoowa kiitanchchay yiis. I duufuwaa doonaappe shuchchaa gonddorssiis. Wotaaddarati keehippe yayyido gishshau, qaaxxananne danddayibookkona. Wurssettan, eti duufo giddo xeelliyo wode, ahay baawa! Wotaaddaratuppe amaridaageeti katamaa biidi qeesetussi yootidosona. He iita qeeseti waatidaakko eray? Worddotanaadan wotaaddaratussi miishshaa immidosona. Qeeseti wotaaddaratussi: ‘Nuuni qammi xiskkidaashin, a erissiyo ashkkarati yiidi a ahaa wuuqqidosona yaagite’ yaagidosona.

Hegee hegaadan deˈishin, Yesuusa kaalliyaageetuppe amarida maccaasati duufuwaa beˈanau yiidosona. Eti duufoy mela deˈiyaagaa beˈidi ay keena dagammidonaashsha! Hegaappe qoppennan bootta maayuwaa maayida naaˈˈu kiitanchchati beettidosona. Eti: ‘Yesuusa hagan ayssi koyeetii? I hayquwaappe denddiichchiis. Eesuwaara biidi erissiyo ashkkaratussi yootite’ yaagidosona. Maccaasati ay keena eesoti woxxidonaashsha! SHin eta ogiyan issi bitanee essiis. I oonakko eray? I Yesuusa! I: ‘Biidi ta erissiyo ashkkaratussi yootite’ yaagiis.

Maccaasati erissiyo ashkkaratussi Yesuusi denddidoogaanne eti a beˈidoogaa yootin, erissiyo ashkkarati hegaa ammananau metootidosona. PHeexiroosinne Yohaannisi bantta huuphen beˈanau duufuwaakko woxxi biidosona, shin duufoy mela deˈees! PHeexiroosinne Yohaannisi biichchin, Magddala Mayraama guyye attaasu. Duufo giddo xeellada naaˈˈu kiitanchchata a beˈidoy he wode.

Yesuusa ahay waanidaakko eray? He ahaa Xoossay xayssiis. Xoossay Yesuusa denttidoy hayqqiiddi i maayido asho bollaara gidenna. I Yesuusayyo, saluwan deˈiya kiitanchchatuugaa mala ayyaana bollaa immiis. Gidoppe attin, nuuni tamaaranau deˈiyoogaadan, Yesuusi i haquwaappe denddidoogaa ba erissiyo ashkkaratussi bessanau, asay beˈana danddayiyo bollaa maayana danddayees.