AQI PEEˈISHIN, Yesuusi bana kaalliyaageetussi darotoo qoncciis. Issitoo i erissiyo ashkkaratuppe 500 gidiyaageeti a beˈidosona. Etayyo i qoncciyo wode, Yesuusi etau odidobi aybakko eray? Xoossaa kawotettaabaa yootiis. Yihooway Yesuusa saˈau kiittidoy he Kawotettaabaa tamaarissanaasa. Ubba i hayquwaappe denddi simmidikka hegaadan oottiyoogaa aggibeenna.

Xoossaa kawotettay aybakko hassayay? Ee, he Kawotettay Xoossaappe gidida saluwan deˈiya tumu ayso; qassi kawo gidanaadan Xoossay Dooridoogee Yesuusa. Nuuni tamaaridi aadhdhidoogaadan, Yesuusi namisettidaageeta mizidi, harggidaageeta pattidinne ubba hayqqidaageeta denttidi, i ayba loˈˈo kawo gidanaakko bessiis!

Hegaa gishshau, Yesuusi kawo gididi shaˈau layttau saluwan haariyo wode, saˈan aybi hananau deˈii? Ee, kumetta saˈay loˈˈiya gannate gidana. Hegaappe simmin ayba oli, makkali, harggee woy ubba hayqoykka deˈenna. Xoossay saˈaa asay ufayttidi deˈiyo gannate gidanaadan medhdhido gishshau, hegee tuma gidiyoogaa eroos. I doomettan Edene atakkiltte sohuwaa giigissidoykka hegaassa. Yesuusikka, Xoossay hanana mala koyiyoobay wurssettan polettanaadan oottana.

Yesuusi simmidi saluwaa biyo wodee haˈˈi gakkiis. Yesuusi 40u gallassaassi ba erissiyo ashkkaratuyyo beettiiddi takkiis. Hegaa gishshau, eti i hayquwaappe denddidoogaa sirokkona. SHin i erissiyo ashkkarata aggidi baanaappe kase etayyo: ‘Intte geeshsha ayyaanaa ekkana gakkanaashin Yerusalaamen takkite’ yaagiis. Geeshsha ayyaanay Yesuusa kaalliyaageeti Xoossaa sheniyaa oottanaadan maaddiya, carkkiya carkko mala gidida, Xoossaa wolqqaa. Wurssettan Yesuusi: ‘Intte saˈaa gaxaa gakkanaashin biidi tabaa sabbakana’ yaagiis.

Yesuusi hegaa gi simmin issi garamissiyaabi haniis. Neeni hagan beˈiyoogaadan saluwaa pude denddiyoogaa doommiis. Hegaappe shaaray a genttin, erissiyo ashkkarati Yesuusa zaarettidi beˈana danddayibookkona. Yesuusi saluwaa biidi, ba erissiyo ashkkarata yan uttidi haariyoogaa doommiis.