HAGAN Dabira Zayte Deriyaa bolli deˈiyaagee Yesuusa. Aara deˈiya he oyddu asati i kiittidoogeeta. Eti ishantta gidida Inddiraasanne PHeexiroosa, qassi hara naaˈˈu ishantta Yaaqoobanne Yohaannisa. Hini haahuwan beettiyaagee Yerusalaamen deˈiya Xoossaa beeta maqidasiyaa.

Yesuusi hare maraa toggidi Yerusalaame geloosappe naaˈˈu gallassa gidiis. He gallassay Masqqayno. He gallassi wonttan Yesuusi beeta maqidasiyan takkiis. Yan qeeseti Yesuusa woranau oyqqana koyidosona. SHin asay Yesuusa dosiyo gishshau, hegaa oottanau yayyidosona.

Yesuusi haymaanootiyaa kaalettiya he asata: ‘Ha shooshshatoo, shooshshaa naatoo’ yaagiis. Hegaappe Yesuusi eti oottido iita ooso ubbaa gishshau, Xoossay eta qaxxayanaagaa yootiis. Hegaappe guyyiyan, Yesuusi Dabira Zayte Deriyaa kiyin, ha oyddu kiitettidaageeti a oychchiyoogaa doommidosona. Eti Yesuusa ay oychchiyaakko eray?

Kiitettidaageeti sinttanaabaa oychchoosona. Eti Yesuusi iitabaa ubbaa saˈaappe xayssanaagaa eroosona. SHin eti hegee aude hananaakko erana koyidosona. Yesuusi Kawo gididi haaranau simmidi yaanay audee?

Yesuusi simmidi yiyo wode, a kaalliya saˈan deˈiyaageeti bana beˈana danddayennaagaa erees. Hegee i deˈanay saluwaana gidiyo gishshataassanne eti a beˈana danddayenna gishshataassa. Yaatiyo gishshau, Yesuusi kiitettidaageetussi i saluwan Kawo gididi haariyo wode, saˈaa bolli hanettana deˈiya amaridabata yootiis. Hegeetuppe issoti issoti aybee?

Yesuusi wolqqaama olati denddanaagaa, daro asay hargganaagaanne namisettanaagaa, keehi iita makkalay deˈanaagaanne wolqqaama biitta qaattay deˈanaagaa yootiis. Yesuusi Xoossaa kawotettaa mishiraachchoy saˈan ubba heeran sabbakettanaagaakka yootiis. Nu wodiyan hageeti polettishin beˈidoo? Ee beˈida! Yaatiyo gishshau, Yesuusi haˈˈi saluwan haariiddi deˈiyoogaa ammanana danddayoos. Mata wode i saˈan deˈiya iitatetta ubbaa xayssana.