HA LOˈˈIYA maccaasiyaa Mayraamo. A Naazireete kataman deˈiya Israaˈeele asa. A keehippe loˈˈo asa gidiyoogaa Xoossay erees. O haasayissana mala i ba kiitanchchaa Gabreela kiittidoy hegaassa. Gabreeli Mayraamissi ay odanau yiidaakko eray? Ane beˈoos.

Gabreeli iyyo: ‘Daro anjjettidaaree, saro; Yihooway nenaara deˈees’ yaagiis. Mayraama he bitaniyaa kase mule beˈa erukku. I woygiyaakko a erabeenna gishshau dagammaasu. SHin sohuwaara Gabreeli o minttettiis.

I: ‘Mayraamee yayyoppa. Yihooway nenan keehi ufayttiis. I issi garamissiyaabaa neessi oottana haniyoy hegaassa. Neeni mata wode naˈa yelada, a Yesuusa yaagada sunttana’ yaagiis.

Gabreeli gujji qonccissiiddi: ‘He naˈay gita gidana; qassi Ubbaappe Bolla Xoossaa Naˈa geetettana. Yihooway a Daawitaagaadan kawo oottana. SHin Yesuusi merinau kawotana; a kawotettau mulekka wurssetti baawa!’ yaagiis.

Mayraama: ‘Ha ubbabay waani hananee? Ta ubba gelannebeykke. Taani attuma asaara deˈa erikke; yaatin, waanada naˈa yelana danddayiyaanaa?’ yaagada oychchaasu.

Gabreeli: ‘Xoossaa wolqqay ne bolli gidana. Hegaa gishshau, naˈay Xoossaa Naˈaa geetettana’ yaagidi zaariis. Hegaappe i Mayraamiyyo: ‘Ne dabbiyo Elssaabeexo hassaya. Asay kase a keehippe cimido gishshau, naˈa yelanau danddayukku yaagees. SHin haˈˈi mata wode a naˈa yelana. Yaatiyo gishshau, beˈa; Xoossay oottana danddayennabi baawa’ yaagiis.

Sohuwaarakka Mayraama: ‘Taani Yihoowa aylliyo! Ne giidoogaadan, taassi hano’ yaagaasu. Hegaappe kiitanchchay biis.

Mayraama eesuwaara Elssaabeexo oychchanau baasu. Elssaabeexa Mayraami sarotaa siyido wode, i uluwan deˈiya naˈay ufayssan qaaxxiis. Elssaabeexin Xoossaa ayyaanay kumin, Mayraamo: ‘Neeni maccaasa ubbaappe dummatada anjjettidaaro’ yaagaasu. Mayraama Elssaabeexi matan heezzu agina gidiyaagaa takkada, Naazireete ba soo simmaasu.

Mayraama Yooseefa giyo bitaniyaa gelanau giiga uttaasu. SHin Yooseefi Mayraama shahaara gidiyoogaa eridi, o ekkennan aggi bayanau qoppiis. Yaatin Xoossaa kiitanchchay ayyo: ‘Mayraamo neessi machcho oottada ekkanau yayyoppa. Iyyo naˈa immidaagee Xoossaa’ yaagiis. Hegaa gishshau, Yooseefi Mayraamo ekkiis; yaatidi eti Yesuusi yelettanaagaa naagidosona.