YESUUSI Samaariyan issi haattaa ollaa matan shemppanau uttiis. I erissiyo ashkkarati qumaa shammanau katamaa biidosona. Yesuusi haasayissiiddi deˈiyo maccaasiyaa haattaa duuqqanau yaasu. I, o: ‘Tana haattaa ushsharkkii’ yaagiis.

Yaagin maccaasiyaa keehippe garamettaasu. Aybissakko eray? Yesuusi Ayhuda, a qassi Samaare asa gidiyo gishshataassa. Daro Ayhudati Samaariyaa asaa dosokkona. Haray atto etaara haasayakka haasayokkona! SHin Yesuusi ubba qommo asaakka siiqees. Yaatiyo gishshau i: ‘Nena haattaa ushsha giyaagee oonakko neeni eriyaabaa gidiyaakko, a oychchana shin; i neeyyo deˈuwaa immiya haattaa immana’ yaagiis.

Maccaasiyaa: ‘Godau, haattay ziqqasan deˈees; qassi neeyyo haatta duuqqiyo xaaroykka baawa. Neeni deˈuwaa immiya haattaa auppe ekkuutee?’ yaagaasu.

Yesuusi qonccissiiddi: ‘Neeni ha ollaa haattaappe uyiyaabaa gidikko, zaarettadakka saamettana. SHin taani immana haattay issi uri merinau deˈanaadan oottana danddayees’ yaagiis.

Maccaasiyaa: ‘Godau, he haattaa tau imma! Yaatikko taani zaarettada mulekka saamettikke. Taani haattaa tikkanau ha sohuwaakka yaana koshshenna’ yaagaasu.

Maccaasiyaa Yesuusi tumu haattaabaa yootees gaada qoppaasu. SHin Yesuusi yootiiddi deˈiyoy Xoossaabaanne a kawotettaabaa xeelliya tumaa. He tumay deˈo immiya haattaa mala. He tumay issi urassi merinaa deˈuwaa immana danddayees.

Hegaappe Yesuusi maccaasiyo: ‘Baada ne azinaa xeesada haa ya’ yaagiis.

Maccaasiyaa: ‘Tau azini baawa’ yaagada zaaraasu.

Yesuusi: ‘Tumaa gaadasa. SHin neeni ichchashu azinaa geladasa; haˈˈi nenaara deˈiya bitanee qassi ne azina gidenna’ yaagiis.

He ubbabay tuma gidiyo gishshau, maccaasiyaa garamettaasu. Yesuusi hegaa waati eridee? Ee, Yesuusi Xoossay kiittido, Hidootan Naagettiyaagaa gidiyo gishshau, Xoossay i hegaa eranaadan oottiis. He wodiyan Yesuusi erissiyo ashkkarati simmidi, Yesuusi Samaare maccaaseera haasayiiddi deˈiyo gishshau garamettidosona.

Ha ubbabaappe nuuni ay tamaariyoo? Yesuusi ubba zare asaassi keha gidiyoogaa bessees. Nuunikka hegaadan oottana bessees. Issi issi asay hara zare gidiyo gishshau, eti iita asa giidi nuuni qoppana koshshenna. Yesuusi ubba asay merinaa deˈuwau kaalettiya tumaa eranaadan koyees. Nuunikka asay tumaa eranaadan maaddanau koyana bessees.