HA CIMA asatuura haasayiya naˈaa beˈa. Eti Yerusalaamen deˈiya Xoossaa beeta maqidasiyan tamaarissiyaageeta. Naˈay qassi Yesuusa. I diccidi, haˈˈi 12u laytta naˈa gidiis.

Yesuusi Xoossaabaanne Geeshsha Maxaafan xaafettidabaa darobaa eriyo gishshau, tamaarissiyaageeti keehippe garamettidosona. SHin Yooseefinne Mayraama aara hagan baynnay aybissee? Eti awan deˈiyoonaa? Ane beˈoos.

Yooseefi layttan layttan Paasika baalaa geetettiya dumma baalaa bonchchanau ba soo asaa ekkidi Yerusalaame bees. Naazireeteppe Yerusalaame baanaagee adussa oge. Oossinne gidin qeeri kaamee baawa; qassi otobiseekka baawa. He wode etayyo hegaa malabati baawa. Asaappe daroy tohuwan hemmettees; hegaadan Yerusalaame gakkanau heezzu gallassa keenaa ekkees.

Haˈˈi Yooseefa soo asay corattiis. Yaatiyo gishshau, Yesuusappe kaalotiya, naagoy koshshiyo a ishanttinne michchontti amaridaageeti deˈoosona. He laytti Yooseefinne Mayraama bantta naatuura he adussa ogiyaa Naazireete simmi biiddi deˈoosona. Eti Yesuusi simmiiddi deˈiya hara asaara deˈees yaagidi qoppidosona. SHin eti saˈay omariyo wode shemppiyoosaa gakkidi, Yesuusa demmana danddayibookkona. Eti bantta dabbotunne laggetu giddon a koyidosona, shin etaarakka deˈenna! Hegaa gishshau, eti a koyanau Yerusalaame simmidosona.

Wurssettan eti Yesuusa hagan tamaarissiyaageetuura deˈiyaagaa demmidosona. I eti giyobaa siyiiddinne eta oychchiiddi deˈees. Yesuusi daro eranchcha gidiyoogaa beˈidi asay ubbay garamettiis. SHin Mayraama: ‘Ta naˈau, nuna ayssi hagaadan oottadii? Ne aawaynne taani nena koyiiddi daro tuggatida’ yaagaasu.

Yesuusi: ‘Tana ayssi koyidetii? Taani ta aawaa keettan deˈana bessiyoogaa ereketii?’ yaagidi zaariis.

Ee, Yesuusi Xoossaabaa tamaaranau danddayiyoosan deˈiyoogaa dosees. Nuunikka hegaadan dosanau bessennee? Ba yiidosan Naazireeten deˈiiddi, Yesuusi saaminttan saaminttan goynuwau shiiqiyoosaa bees. I ubbatoo loytti eziggiyo gishshau, Geeshsha Maxaafaappe darobaa tamaariis. Ane nuunikka Yesuusa milatoosinne a leemisuwaa kaalloos.