HA ASATUPPE issoy malaatiiddi deˈiyo he keehi pooˈiya xoolinttiyaa beˈay? He xoolinttee, eti Yerusalaameppe kiyi simmin beettiis. Ha asati Arshsho baggappe yiida, xoolinttiyaa qoodiyaageeta. Eti ha ooratta xolinttee banttana issi erettida asakko kaalettiiddi deˈiyoobadan ammanoosona.

He asati Yerusalaame gakkido wode: ‘Ayhuda kawo gidanau yelettida naˈay awan deˈii?’ yaagidi oychchidosona. “Ayhuda” giyoogee Israaˈeeletussi hara suntta. Asati: ‘Nuuni koyro Arshsho bagga biittan deˈiiddi naˈaa xoolinttiyaa beˈidi, assi goynnanau yiida’ yaagidosona.

Yerusalaamen deˈiya kawoy Heeroodisi, hegaa siyidi dagammiis. Hara asi kawotettaa baappe ekkana mala koyibeenna. Hegaa gishshau, Heeroodisi qeese halaqata xeesidi: ‘Asay naagiyo kawoy awan yelettaneeshsha?’ yaagidi oychchiis.

Eti: ‘Geeshsha Maxaafay Beetaliheemeena yaagees’ yaagidi zaaridosona. Yaagin Heeroodisi away mokkiyo baggappe yiida asata xeesidi: ‘Biidi naˈaa mintti koyite. A demmidi tanakka erissite. Taanikka baada ayyo goynnana koyayiis’ yaagiis. SHin, tumuppe Heeroodisi naˈaa koydoy demmidi a woranaasa!

Hegaappe, he xoolinttee asata kaalettidi Beetaliheemen naˈay deˈiyosaa gakkinne, eqqi aggiis. Asati soo gelidi, Mayraamonne guutta naˈaa Yesuusa demmidosona. Eti imotaa kessidi Yesuusassi immidosona. SHin guyyeppe Yihooway he asati simmidi Heeroodisakko beenna mala aymuwan seeriis. Hegaa gishshau, eti hara ogiyaara bantta biitti simmidosona.

Heeroodisi Arshsho baggappe yiida asati bantta biitti biichchidoogaa siyidi, keehippe yiillotiis. Yaatiyo gishshau, Beetaliheemen deˈiya layttay naaˈˈa kumidonne hegaappe guuxxiya attuma naata ubbaa wotaaddarati woranaadan azaziis. SHin Yihooway kasetidi Yooseefassi aymuwan hegaa erissin, Yooseefi ba soo asaara Gibxxe biis. Guyyeppe, Heeroodisi hayqqidoogaa Yooseefi siyidi, Mayraamonne Yesuusa ekkidi, simmidi ba dere Naazireete yiis. Yesuusi diccidoy yaana.

He ooratta xoolinttiyaa pooˈoy beettanaadan oottiday oona gaada qoppay? Asati xoolinttiyaa beˈi simmidi, koyro Yerusalaame biidoogaa hassaya. Seexaanaa Dablloosi Xoossaa Naˈaa worana koyiis; i Yerusalaame Kawoy Heeroodisikka Yesuusa woranau koyanaagaa eriis. Hegaa gishshau, he xoolinttiyaa pooˈoy beettanaadan oottidaagee Seexaanaa gidana bessees.