YESUUSINNE i kiittidoogeeti pooqiyan deˈiya kifiliyaappe kiyidi, Geetesamaane ataakiltte sohuwaa biidosona. Hegaappe kase ha sohuwaa darotoo yiidosona. Yesuusi eti xiskkennan woossiiddi takkanaadan yootiis. Hegaappe guuttaa haakki biidi, woossanau biittan gufanniis.

Takkidi, Yesuusi simmidi ba kiittidoogeeti deˈiyoosaa yiis. Eti ay oottiiddi deˈiyaabaa neeyyo milatii? Eti xiskkidosona! Eti beegotti naaganau bessiyoogaa Yesuusi heezzutoo yootiis; shin i simmi yiyo wode ubban eti xiskkiiddi deˈiyaageeta demmiis. Heezzanttuwan Yesuusi simmi yiidi: ‘Hagaa mala wodiyan waani xiskkeetii? Tana ta morkketuyyo aattidi immiyo wodee gakkiis’ yaagiis.

Sohuwaarakka daro asay wocamiyoogee siyettiis. Beˈa! Asay bisuwaanne dullaa oyqqidi yees! Etau pooˈana mala xomppiyaakka oyqqidosona. Eti matattido wode, issi bitanee asaa giddoppe kiyidi Yesuusakko yiis. Hagan neeni beˈiyoogaadan, i Yesuusa yeriis. He bitanee Asqqorootu Yihudaa! I Yesuusa aybissi yerii?

Yesuusi: ‘Yihudaa, tana yerada aatta immay?’ yaagiis. Ee, he yeroy malaata. He malaatay Yihudaara deˈiya asati eti koyiyo bitaniyaa Yesuusa eranaadan oottees. Yaatiyo gishshau, Yesuusa morkketi a oyqqanau shiiqidosona. SHin PHeexiroosi eti Yesuusa ekkidi biyo wode coˈˈu giidi xeellana koyibeenna. I ba oyqqido bisuwaa shoohuwaappe kessidi, ba matan deˈiya bitaniyaa qanxxiis. Bisoy bitaniyaa huuphiyaa halidi, ushachcha hayttaa duutti oliis. SHin Yesuusi bitaniyaa hayttaa bochchidi patti aggiis.

Yesuusi PHeexiroosassi: ‘Ne bisuwaa a sohuwan zaarada wotta. Tana ashshanau daro shaˈan qoodettiya kiitanchchata kiittanaadan taani ta Aawaa oychchana danddayiyoogaa erikkii?’ yaagiis. Ee, i oychchana danddayees! SHin Yesuusi ba morkketi bana oyqqiyo wodee gakkidoogaa eriyo gishshau, issi kiitanchchanne kiittanaadan Xoossaa oychchibeenna. Yaatiyo gishshau, eti bana ekki baanaadan coˈˈu giis. Ane haˈˈi Yesuusa gakkidabaa beˈoos.