YESUUSI hagan keehippe hanqqettidabaa milatees; milatennee? I hegaadan keehippe hanqqettidoy aybissakko eray? Yerusalaamen Xoossaa beeta maqidasiyan deˈiya ha asati keehippe yiiqetiyaageeta gidiyo gishshataassa. Eti Xoossaayyo goynnanau yiida asaappe daro miishsha demmanau koyidosona.

He ubba mirggota, dorssatanne haraphpheta beˈay? Asati he meheta hagan beeta maqidasiyan bayzziiddi deˈoosona. Aybissakko eray? Israa⁠ˈeeleti Xoossaassi yarshshanau mehetanne kafota koyiyo gishshataassa.

Xoossaa higgee issi Israaˈeele asi nagara oottiyaabaa gidikko, Xoossaassi yarshshana bessiyoogaa yootees. Israaˈeeleti yarshshiyo hara wodetikka deˈoosona. SHin issi Israaˈeele asi Xoossaassi yarshshiyo kafotanne meheta awappe demmana danddayii?

Issi issi Israaˈeeleti kafotanne meheta haaridosona. Yaatiyo gishshau, eti hegeeta yarshshanau danddayoosona. SHin daro Israaˈeeletuyyo meheti woykko kafoti deˈokkona. Harati qassi Yerusalaameppe keehi haakkidi deˈiyo gishshau, bantta mehetuppe issuwaa beeta maqidasiyaa ehaana danddayokkona. Yaatiyo gishshau, asay ha sohuwaa yiidi, bana koshshiya mehetanne kafota shammees. SHin ha asati asaa keehi daro miishshaa qanxxisoosona. Eti asaa cimmoosona. Hegaa bollan qassi, eti ha sohuwan, Xoossaa beeta maqidase giddon bayzzana bessenna.

Yesuusi hanqqettidoy hegaassa. Yaatiyo gishshau, i asatu miishshaara deˈiya xaraphpheezaa aatti yeggidi, eta santtimiyaa laali aggiis. Qassi xurqqayyiyaa dooqqidi, mehiyaa ubbaa beeta maqidasiyaappe kare yedettiis. I haraphpheta bayzziiddi deˈiya asata: ‘Haraphpheta hagaappe kessite! Ta aawaa keettaa zalˈˈidi duretiyoosa oottopite’ yaagidi azaziis.

Yesuusa kaalliyaageetuppe amaridaageeti aara hagan Yerusalaame beeta maqidasiyan deˈoosona. Eti Yesuusi oottiiddi deˈiyoobaa beˈidi garamettidosona. Hegaappe eti Geeshsha Maxaafan Xoossaa Naˈaabaa: ‘Xoossaa keettaa mishoy a tamadan xuuggana’ yaagiya sohuwaa hassayidosona.

Yesuusi Paasikaa bonchchanau hagau Yerusalaame yiido wode, daro maalaalissiyaabata oottiis. Hegaappe guyyiyan, Yesuusi Yihudaappe kiyidi simmidi Galiila biyoogaa doommiis. SHin biiddi, Samaariyaa auraajjaara kaanttidi biis. Yan aybi hanidaakko ane beˈoos.