KEEHIPPE azzanttiyaabi merettiis. Xammaqiya Yohaannisa biron wori simmoosona. Kawuwaa machchiyaa Heeroodiyaada a dosukku. A, kawoy Yohaannisa qooriyaa muucissanaadan oottaasu.

Yesuusi hegaa siyidi, keehippe azzaniis. Yesuusi hegaappe barkka asi baynnasaa biis. SHin asay a kaallidi biis. Yesuusi cora asaa beˈidi, etau qarettiis. Yaatiyo gishshau, Xoossaaa kawotettaabaa etassi yootiisinne eta giddoppe harggidaageetakka pattiis.

He gallassa omarssi i erissiyo ashkkarati akko yiidi: ‘Haˈˈi saˈay qammiichchiis; ha sohoykka asi baynnasa. Asay matan deˈiya katamata biidi, bau qumaa shammana mala yedda’ yaagidosona.

Yesuusi: ‘Eti baanau bessenna. Etau miyoobaa intte immite’ yaagidi zaariis. Yesuusi Piliphphoosakko simmidi: ‘Ha ubba asaa mizanau gidiya quma awuppe shammana danddayiyoo?’ yaagidi oychchiis.

Piliphphoosi: ‘Asaassi huuphiyan huuphiyan qii guuttaa gattanaukka keehippe daro miishsha koshshees’ yaagiis. Hegaappe Inddiraasi: ‘Ba qumaa oyqqida ha naˈaayyo ichchashu oyttaynne naaˈˈu molee deˈees. SHin ha ubba asau hegee aynne maaddenna’ yaagiis.

Yesuusi: ‘Asaa maatan utissite’ yaagiis. Hegaappe Yesuusi qumaa gishshau Xoossaa galatidi, hegaa darosan shaakkiyoogaa doommiis. Hegaappe, erissiyo ashkkarati oyttaanne moliyaa ubba asau gishidosona. Hegan 5,000u attuma asay, hegaappe keehi dariya shaˈan qoodettiya maccaasaynne naati deˈoosona. Eti ubbay kallana gakkanaashin miidosona. Erissiyo ashkkarati attida xarzzaa shiishshiyo wode, 12u samppaa kumiis!

Hegaappe Yesuusi, ba erissiyo ashkkarati Galiila Abbaa pinnanau wolwoluwan gelanaadan oottiis. Qamman wolqqaama carkkoy denddidi, wolwoluwaa yaanne haanne sugiis. Erissiyo ashkkarati keehippe yayyidosona. Hegaappe qammaappe 6n saatiyan, haattaa bolli hemettiiddi etakko yiya issi asa beˈidosona. Eti beˈiyoobi aybakko eribeenna gishshau, yayyidi waassidosona.

Yesuusi: ‘Tanattennee; yayyoppite!’ yaagiis. Eti hegankka ammanibookkona. Yaatiyo gishshau, PHeexiroosi: ‘Godau, hagee tumu nena gidikko, taani haattaa bollaara neekko baana mala, oottaarkkii’ yaagiis. Yesuusi: ‘Haa ya!’ yaagiis. Yaagin PHeexiroosi kiyidi, haattaa bollan hemettiis! Hegaappe i yayyin, haattay a mittiyoogaa doommiis; shin Yesuusi a ashshiis.

Takkidi, Yesuusi haranttuwaakka shaˈan qoodettiya asaa miziis. He wode i laappun oyttaaninne guutta qiiba moletun hegaattuwaa oottiis. Kaseegaadaankka ubbaassi gididi palahiis. Yesuusi asaayyo qoppiyo hanotay daro garamissiyaaba gidennee? I Xoossay sunttido kawo gididi haariyo wode, nuna hirggissiyabi aybinne deˈenna!