YESUUSI hagan uttidaagaa beˈa. I ha ubba asaa Galiilan deˈiya issi deriyaa bollan tamaarissiiddi deˈees. Akko matattidi uttidaageeti a erissiyo ashkkarata. I eta giddoppe 12ta kiitettidaageeta gidanaadan dooriis. Kiitettidaageeti Yesuusi erissiyo dumma ashkkarata. Ne eta sunttaa eray?

Etappe Simoon PHeexiroosinne a ishaa Inddiraasi deˈoosona. Qassi hara ishantti, Yaaqoobinne Yohaannisikka deˈoosona. Yaaqooba geetettiya hara kiitettidaageenne Simoona geetettiya haraykka deˈees. Kiitettidaageetuppe naaˈˈaa sunttay Yihudaa. Issoy Asqqorootu Yihudaa gidishin hara Yihuday qassi Taaddiyoosakka geetettees. Hegeetuppe harati qassi Piliphphoosanne Naatinaaˈeela (Barttalamoosakka geetettees), Maatiyoosanne Toomaasa.

Samaariyaappe simmoogaappe guyyiyan, Yesuusi: ‘Saluwaa kawotettay matattiis’ yaagidi he wode koyro sabbakiyoogaa doommiis. He kawotettay aybakko eray? Hegee Xoossay ayssiyo tumu aysuwaa. He kawotettaa kawoy Yesuusa. I saluwan uttidi haarana; qassi saˈau sarotettaa ehaana. Xoossaa kawotettan kumetta saˈay loˈˈiya gannate gidana.

Yesuusi hagan asaa he kawotettaabaa tamaarissiiddi deˈees. I qonccissiiddi: ‘Intte hagaadan giidi woossana bessees. Saluwan deˈiya nu aawau, ne sunttay bonchchetto. Ne kawotettay yo. Ne shenee saluwan hanidoogaadan, saˈankka hano’ yaagiis. Daro asay hegaa ‘Godaa Woosaa’ yaagidi xeegees. Harati ‘Nu Aawau’ giyo woosaa yaagoosona. Ha woosaa wurssada gaanau danddayay?

Yesuusi asay issoy issuwaara siga deˈiyo ogiyaakka tamaarissiis. I: ‘Harati inttessi oottanaadan koyiyoobaa inttekka etassi oottite’ yaagiis. Hara asi neessi kehatettaa bessiyo wode dosikkii? Hegaa gishshau, Yesuusi, nuunikka hara asaassi kehatettaa bessana koshshiyoogaa yootiis. Gannate biittan ubba asay hegaadan oottiyo wode deˈanaagee keehi ufayssennee?