YESUUSA hagan beˈa; guutta naˈaa qoommi uttiis. Yesuusi guutta naatuyyo tumuppe qarettiyoogaa erana danddayaasa. Hanettiyaabaa be⁠ˈiiddi deˈiya asati Yesuusi kiittidoogeeta. Yesuusi etau woygiiddi deˈii? Ane beˈoos.

Yesuusinne i kiittidoogeeti haahosaa biidi simmosaara deˈoosona. Kiitettidaageeti yiiddi ogiyan issoy issuwaara palamettidosona. Yaatiyo gishshau, yi simmin Yesuusi eta: ‘Intte ogiyan deˈiiddi palamettidobay aybee?’ yaagidi oychchiis. Tumuppe, eti aybin palamettidaakko Yesuusi erees. SHin i he oyshaa oychchidoy eti ayyo yootanaakkonne beˈanaassa.

Kiitettidaageeti ogiyan deˈiiddi, eta giddon ubbaappe aadhdhiyay oonakko palamettido gishshau, coˈˈu giidosona. Kiitettidaageetuppe issoti issoti haratuppe aadhdhidi beettanau koyidosona. Ubbaappe aadhdhi beettanau koyiyoogee likke gidennaagaa Yesuusi etau waati yootaneeshsha?

I guutta naˈaa xeessidi, eta ubbaa sinttan essiis. Hegaappe ba erissiyo ashkkaratussi: ‘Intte laamettidi guutta naatudan hanana xayikko, Xoossaa kawotettaa mulekka gelanau danddayennaagaa, hagaa intte eranaadan koyayis. Xoossaa kawotettan ubbaappe aadhdhiyay ha naˈaadan haniya ura’ yaagiis. Yesuusi hegaa aybissi giidaakko eray?

Keehi guutta naati haraatuppe gita gididi woykko aadhdhidi beettanau qoppokkona. Yaatiyo gishshau, kiitettidaageeti haraatuppe gitati woykko aadhdhi beettanau palamettiyoogaa aggidi, guutta naatudan hananau tamaarana koshshees.

Yesuusi guutta naatussi ay keena qarettiyaakko bessido hara wodetikka deˈoosona. Guutta aginappe simmin, amarida asati bantta naata Yesuusakko ekki yiidosona. Kiitettidaageeti naati akko yeennaadan teqqana koyidosona. SHin Yesuusi kiitettidaageeta: ‘Guutta naati taakko yona; eta diggoppite; ayssi giikko, Xoossaa kawotettay eta mala asaassa’ yaagiis. Hegaappe Yesuusi naata idimmidi, anjjiis. Yesuusi guutta naata siiqiyoogaa eriyoogee loˈˈoba gidennee?