HA NE beˈiyo naˈiyaa 12u laytta naˈa. Yesuusi i kushiyaa oyqqi uttiis; qassi i aayyiyaanne i aaway matan eqqidosona. Eti keehi ufayttidaba milatiyoy aybissakko eray? Ane beˈoos.

Naˈee aaway Yaaˈiroosa geetettiya erettida asa. Issi gallassi a naˈiyaa sahettin, hiixan zinˈˈissidosona. SHin issi aynne kehana danddayibeenna. Issi sahoy goobi goobi biis. Bantta guutta naˈiyaa hayqqana haniyaabaa milatin, Yaaˈiroosinne a machchiyaa keehi hirggidosona. Etau ippe hara naˈi baawa. Hegaa gishshau, Yaaˈiroosi Yesuusa koyanau biis. I Yesuusi oottiyo maalaalissiyaabatubaa siyiis.

Yaaˈiroosi Yesuusakko gakkiyo wode, a matan keehi cora asay deˈees. SHin Yaaˈiroosi cora asaa giddoora kantti biidi, Yesuusau tohuwan kunddiis. I: ‘Ta naˈiyaa keehippe sahettausu. Hayyanaa baada o pattarkkii?’ yaagidi woossiis. Yesuusi baanau eeno giis.

Eti biishin, asay a mata shiiqanau, sugettiiddi dees. Qoppennan Yesuusi eqqi aggiis. I: ‘Tana bochchiday oonee?’ yaagidi oychchiis. Yesuusi baappe wolqqay kiyidoogaa erido gishshau, bana bochchida uray deˈiyoogaa eriis. SHin a oonee bochchiday? Bochchidaara 12u layttaa keehippe harggada deˈida issi maccaasiyo. A yaada Yesuusa maayuwaa bochchaanne paxa aggaasu!

Issi ura pattanaagee Yesuusa metennaagaa Yaaˈiroosi erˈidoogee a keehi minttettiis. SHin issi bitanee kiitaa ekkidi yiis. I Yaaˈiroosa: ‘Yesuusa coo daafurssoppa. Ne naˈiyaa hayqqaychchaasu’ yaagiis. Eti haasayishin Yesuusi siyidi Yaaˈiroosassi: ‘Dagammoppa, a paxana’ yaagiis.

Eti wurssettan Yaaˈiroosa soo gakkiyo wode, asay keehippe azzanidi yeekkiiddi deˈees. SHin Yesuusi: ‘Yeekkoppite; naˈiyaa xiskkausuppe attin, hayqqabeykku’ yaagiis. SHin eti naˈiyaa hayqqidoogaa eriyo gishshau, miccidosonanne Yesuusa bolli qilliccidosona.

Hegaappe Yesuusi naˈee aayyiyonne aawaa qassi ba kiittidoogeetuppe heezzata ekkidi, naˈiyaa zinˈˈido kifiliyaa geliis. Yesuusi i kushiyaa oyqqidi: ‘Dendda!’ yaagiis. Ne hagan beˈiyoogaadan, naˈiyaa hayquwaappe dendda aggaasu. Qassi dendda eqqada yaa haa hemettaasu! I aayyiyaanne i aaway keehippe ufayttidoy hegaassa.

Yesuusi hayquwaappe denttido koyro asi ha naˈiyo gidukku. Koyro i denttidoy Nayna kataman deˈiya issi amˈˈee naˈaa gidiyoogaa Geeshsha Maxaafay yootees. Hegaappe takkidi, Yesuusi Marttinne Mayraami ishaa Alˈˈaazaarakka hayquwaappe denttiis. Yesuusi Xoossan sunttettida kawo gididi haariyo wode, hayqqida keehi daro asaa deˈuwau zaaridi ehaana. Hegan nuuni ufayttana bessennee?