ISSI gallassi Yesuusi issi bitanee ba shooruwaa siiqana bessiyoogaa ayyo yootiis. Bitanee Yesuusa: ‘Ta shooroy oonee?’ yaagidi oychchiis. He bitanee ay qoppiiddi deˈiyaakko Yesuusi erees. Bitanee, ba shooroti banaara ammanuwaaninne zariyan issuwaa gididaageeta giidi qoppiis. Yaatiyo gishshau, Yesuusi ayyo woygidaakko ane beˈoos.

Yesuusi issi issi wode taarikiyaa yootidi tamaarissees. I haˈˈi oottidoykka hegaadaana. I yootidoy issi Ayhudanne issi Samaariyaa asa taarikiyaa. Daro Ayhudati Samaariyaa asaa dosennaagaa kase tamaarida. Yesuusi yootido taarikee hagaappe kaallidi deˈiyaagaa:

Issi gallassi issi Ayhuda bitanee deretiya ogiyaara Yarkko wodhdhiiddi deˈees. SHin bonqqiyaageeti a bolli kiyidosona. Eti a miishshaa ekkidi, hayqqidabaa milatana gakkanaashin a shocidosona.

Hegaappe guyyiyan, issi Ayhuda qeesee he ogiyaara aadhdhiis. I he shocettida bitaniyaa beˈiis. I ay oottidabaa neeyyo milatii? I ubba ogiyau hara bagga gaxaa oyqqidi hemetti aggiis. Hegaappe hara keehippe ammaniyaabaa milatiya bitanee yiis. I Leewa zare. I bitaniyaa beˈidi eqqideeshsha? CHii, ikka he shocettida bitaniyaa maaddanau eqqibeenna. Qeeseenne Leewa zaree haakkidi ogiyaa duge wodhdhiyaageeta beˈana danddayaasa.

SHin shocettida bitaniyaara hagan deˈiya bitaniyaa beˈa. I Samaare asa. I Ayhuda bitaniyaa maaddiiddi deˈees. I bitaniyaa masunttan xaliyaa wottiiddi deˈees. Hegaappe, Ayhuda bitaniyaa, ayyo kehana gakkanaashin shemppiyo sohuwaa ekkidi biis.

Yesuusi taarikiyaa yooti wurssidi, bana oychchida bitaniyaa: ‘Ha heezzu asatuppe shocettida bitaniyau shoorodan haniday augaa gaada qoppay? Qeesee, Leewa zareeyye woykko Samaare bitanee?’ yaagidi oychchiis.

Bitanee: ‘Samaare bitaniyaa. I shocettida bitaniyaayyo qarettiis’ yaagidi zaariis.

Yesuusi: ‘Tumaa gaadasa. Neenikka baada haratussi i oottidoogaadan ootta’ yaagiis.

Yesuusi tamaarissiyo ogiyaa dosikkii? Geeshsha Maxaafan deˈiya Yesuusi giidobata siyiyaaba gidikko, daro goˈˈiyaabaa tamaarana danddayoos; danddayookkonii?