HAGEE tumu taariketa oyqqida maxaafa. Taariketi ekettidoy alamiyan deˈiya ayba maxaafatuppekka nashshettida, Geeshsha Maxaafaappe. Ha taariketi Xoossay medhdhiyoogaa doommoosappe hanno gakkanaashin alamiyan hanettidabata yootoosona. Eti ubba, Xoossay wodeppe oottanaayyo qaalaa gelidobatakka yootoosona.

Ha maxaafay, Geeshsha Maxaafan deˈiya kumetta qofay aybakko qonccissees. Etabaynne eti oottidobay Geeshsha Maxaafan xaafettido asatubaa yootees. I, gannate biittan asay merinau deˈanaadan Xoossay giigissido gita hidootaabaakka erissees.

Ha maxaafan 116n taariketi deˈoosona. He taariketi hosppunan shaahettidosona. SHaahotu ubbaayyo doomettan deˈiya issi sinttay, he shaahuwaa giddon deˈiyabaa qanttan yootees. Taariketi xaafettidoy polettido wodiyaa maaraadaana. Hegee, issi hanettidabay hara taarikiyaara gatti xeelliyo wode, aude polettidaakko eranau nena maaddees.

Taariketi wayssenna qaalan xaafettidosona. Yelagatoo, intte giddoppe daroti ha taariketa intte huuphe nabbabana danddayeeta. Yelidaageetoo, ha taariketa intte guutta naatussi intte zaari zaari nabbabiyo wode, eti ufayttiyoogaa akeekana danddayeeta. Ha maxaafay yelagata gidin, cimatakka gidin daro ufayssiyaaba oyqqidoogaa beˈana danddayeeta.

Ubba taariketu wurssettan Geshsha Maxaafaa xiqiseti deˈoosona. Taariketi baasettido Geeshsha Maxaafaa kifileta nabbabanaadan inttena minttettoos. Issi taarikiyaa tamaari wurssoogaappe guyyiyan, he taarikiyau giigida oyshata, Taarikiyaa 116ppe guyye baggan beˈidi zaaruwaa immanau malite.