1. Xoossaa ufayssanau nuuni ay oottana bessii?

NUUYYO ufayssiya siiqo dabbotay Xoossaara deˈanaadan worddo haymaanootiyan shaahettana bessenna. Nuuni tumu haymaanootiyaa kaallana bessees. Ha wodiyan, alamiyaa yuushuwan miilooniyan qoodettiya asay hegaadan oottiiddi deˈees.

2. Yihoowa Markkati shiiqidoy awuppee? Eta oosoy aybee?

² Geeshsha Maxaafay kasetidi yootidoogaadan, tumu haymaanootiyaa kaalliyaageeti “zare ubbaappe, qommo ubbaappe, yara ubbaappenne dumma dumma biitta qaala ubbaappe” shiiqida “zawai bainna daro asaa” gididosona. (Ajjuutaa 7:9) Miilooniyan qoodettiya Yihoowa Markkati, 235 biittatun Yihoowa siiqo ogiyaabaanne i koyiyoobaa tamaarissiyoogan harata wozanappe maaddiiddi deˈoosona.

3. Yihoowa Markkati ooyyo goynniyoonaa? Eti ayba qommo goynuwaappe haakkiyoonaa?

³ Yihoowa Markkati goynoy bessiyoy Yihoowa xallaassa gidiyoogaa eroosona. Eti eeqau woy haymaanoote misiliyau goynnokkona. (1 Yohaannisa 5:21) Hayqqidaageeta bonchanau ahaa naagiyoogaa woy worddo haymaanootiyaa ammanuwaanne “xalahetu timirttiyaa” minttettiya hara baalata bonchokkona. (1 Ximootiyoosa 4:1) Gidikkokka, eti hayqqidaageeta Xoossay gannate gidiya saˈan denttanau qaalaa gelidoogaa yootiyoogan kayyottiyaageeta minttettoosona.—Yohaannisa 5:28, 29; Oosuwaa 24:15.

4. Kaayiyoogaa Xoossaa asay waati xeellii?

⁴ Bitiyoogee, shareechiyoogee woykko murunniyoogee Dabloosappe gidiyoogaa eriyo gishshau, Yihoowa Markkati hegaa malabaa oottokkona. Banttana iitabaappe naaganaadan kaayuwan ammanettokkona; eti ammanettiyoy Yihoowana.—Leemiso 18:10.

5. Yihoowa Markkati “sa7aassa” gidennay ayba ogiyaanee?

⁵ Yesuusi ba erissiyo ashkkarati “sa7aassa” gidennaagaa yootiis. (Yohaannisa 17:16) Yesuusi ba wode deˈiya polotikan gelibeenna. (Yohaannisa 6:15) Hegaadankka, Yihoowa Markkati polotikan, bantta biittaa xoqqu oottidi xeelliyoogaaninne huqqunnettida giyaageetu baaxiyan gelokkona. Gidikkokka, eti qaraxaa qanxxoosonanne bantta deˈiyo biittaa higgiyau azazettoosona.—Yohaannisa 15:19; Roome 13:1, 7.

6. Ekkiyoogaanne geliyoogaa, qassi macho yeddiyoogaanne azinappe kiyiyoogaa xeelliyaagan Xoossau oottiyaageeti ay kaaleto kaalliyoonaa?

⁶ Yihoowa Markkati kawotettaa higgiyau azazettiyo gishshau, eti ekkiyoynne geliyoy higgiyaadaana. (Tiitu 3:1) Eti Xoossaa higgiyau azazettiyo gishshau, dawuttokkona. (1 Ximootiyoosa 3:2) Hegaa bollankka, eti Geeshsha Maxaafaa baaso siraataa bantta deˈuwan oosuwan peeshshiyo gishshau, macho yeddiyoogan woy azinappe kiyiyoogan darotoo eta aqo deˈoy laalettenna.

7. Yihoowa Markkati issoy issuwaa siiqiyoogaa waatidi bessiyoonaa?

⁷ Yihoowa Markkati issoy issuwaara siiqettoosona. He siiqoynne Xoossaa siiqiyoogee, eti daro qommuwaappenne zariyaappe yiidaba gidikkonne, tumu ishatettan issippetettay deˈanaadan oottiis. Meretaa daafay gakkiyo wode woy koshay geliyo wode, Yihoowa Markkati issoy issuwaa maaddanau sohuwaara gakkoosona. Yihoowa Markkati siiquwaa bantta deˈuwan bessoosona.—Yohaannisa 13:35.

8. Xoossaa asay ayba oosotuppe haakkii?

⁸ Yihoowa asay ammanettidinne suure gididi deˈanau baaxetees. Eti wuuqqokkona, worddotokkona, shori baynna asho gaytotettaa polokkona, mattottokkonanne zalˈˈiyaara gayttidaban ammanettiyaageeta. Azinati bantta machota wadhokkona. Issoti issoti Yihoowa Markka gidanaappe kase hegaadan  oottiyaageeta; shin Yihoowa maaduwan aggidosona. Eti Xoossaa xeelan ‘meecettidosonanne geeyidosona.’—1 Qoronttoosa 6:9-11.

9. Afirkkan deˈiya Kiristtaane giyo woosa keettata xeelliyaagan issi maxaafay woygidee?

⁹ Daro haymaanootiyan deˈiya asay ba ammanoy tuma giidi qoppiyoogee erettidaagaa. Hegaa bessanau maalaalissiya oosota oottana danddayoosona. Afirkkan deˈiya Kiristtaane giyo woosa keettata xeelliyaagan issi maxaafay kaallidi deˈiyaagaadan giis: “Issi shareechoy kase oottiyoobaa [ooratta Kiristtaane citati] oottoosona. . . . Eti hiraagaa yootiyaabadaaninne maalaalissiyaabaa oottiyaabadan yootoosona. Eta giddon hiraagaa yootiyaageeti asay ajjuutaa beˈanaadan oottoosonanne aymuwaa birshshoosona. Eti asaa harggiyaappe pattanaunne harggiyaa teqqanau xabaalaa, boncho zaytiyaa, bidinttaa, muqaaddaanne ixaanaa goˈettoosona.”

10, 11. Ha wodiyan maalaalissiyaaba giyobati issi haymaanootee Xoossaappe gidiyoogaa bessennay aybissee?

¹⁰ Ha haymaanootetu yameti maalaalissiya oosoy, Xoossay bantta haymaanootiyaa anjjidoogau naqaasha goosona. SHin maalaalissiyaaba giyoobay he haymaanootee Yihoowa ufayssiyoogaa qonccissenna. Worddo haymaanootiyaa kaalliyaageeti “garamissiyaabaa” oottanaadan wolqqaa immiyay Seexaanaa. (2 Tasalonqqe 2:9) Hegaa bollikka, hananabaa yootiyoogaa, hara qaalan haasayiyoogaanne dumma eraa malatiya, Xoossay immiyo maalaalissiya imotati ‘xayanaagaa’ Geeshsha Maxaafay kasetidi yootiis.—1 Qoronttoosa 13:8.

¹¹ Yesuusi hagaadan akeekissiis: “Saluwan de7iya ta Aawai giidoogaa oottiya urai [saluwaa Kawotettaa] gelanaappe attin, ‘Ta Godau, ta Godau’ giya ubbai gelenna. He gallassi daro asai tana, ‘Nu Godau, nu Godau, nuuni ne sunttan hananabaa yootibookkonii? Ne sunttan xalaheta kessibookkonii? Qassi nuuni Xoossai oottiyo malaataa ne sunttan oottibookkonii?’ yaagana. Taani he wode eta, ‘Taani inttena mulekka erikke; iitabaa oottiyaageeti intte ta matappe haakkite’ yaagana.”—Maatiyoosa 7:21-23.

12. Saluwaa Kawotettaa gelanay oonee?

¹² Yaatin, saluwaa Kawotettaa gelanay oonee? Yihoowa sheniyaa oottiyaageeta.

13. Xoossay ha wodiyan ba asati oottanaadan azaziyo oosoy awugee? Hegaa oottiiddi deˈiyaageeti oonee?

¹³ Ha wodiyan deˈiya Xoossaa asau a shenee aybee? Yesuusi: “Asa ubbau markka gidana mala, kawotettaa wonggeliyaa mishiraachchoi sa7a ubban odettana” yaagiis. (Maatiyoosa 24:14) Ha oosoy Yihoowa Markkati mishettidi oottiyo ooso.

14. Xoossaa Kawotettay aybee? He Kawotettan haaranay oonee?

¹⁴ Yihoowa Markkati Xoossaa Kawotettay kumetta saˈaa geeshshatettan haarana saluwaa ayso gidiyoogaa “sa7a ubban” odoosona. Yihooway Kiristtoos Yesuusa he Kawotettau kawo oottidi, asaappe doorettida 144,000tuura issippe haaranaadan sunttidoogaa eti tamaarissoosona.—Daaneela 7:14, 18; Ajjuutaa 14:1, 4.

15. Xoossaa Kawotettay xayssanay aybee?

¹⁵ Yihoowa Markkati, Geeshsha Maxaafaa goˈettidi Xoossaa Kawotettay Seexaanaa iita siraataa kumettaa xayssanaagaa asau qonccissoosona. Worddo haymaanootee Dabloosa bonchiyoonne Xoossaa toochiyo ba timirttiyaara xayana! (Ajjuutaa 18:8) Xoossaa eqettiya asa aysoykka ubbay xayana!—Daaneela 2:44.

16. Kiristtoos Yesuusau haarettanay oonee? Eti deˈanay awaanee?

¹⁶ Hegaa bollikka, Yihoowa Markkati Xoossay koyiyoobaa oottiya ubbaayyo Kiristtoos Yesuusi maalaalissiya anjjuwaa ehaanaagaa yootoosona. Eti saˈan ayyo haarettiyaageeta gidana. Geeshsha Maxaafay: “A xeesiya hiyyeesata, naaqettidaageetanne maaddiyaabi bainnaageeta i ashshees. Hiyyeesatussinne manqqotussi i qarettees; hiyyeesatu shemppuwaa ashshees” yaagidi yootees.—Mazamure 72:12, 13.

17. Xoossaa Kawotettaa awaajjiyaageeti o xallee?

¹⁷ Kawotettaa mishiraachuwaa yootiyoogan Xoossaa sheniyaa poliya hara asaa citi deˈenna. Saˈaa yuusho ubban Xoossaa Kawotettaa erissiyaageeti Yihoowa Markkatu xalla.