SHAAHO 1
Tumaa Tamaarissiyay Ubba Haymaanootee?
1. Afirkkan deꞌiya haymaanootetuppe issoti issoti awugeetee?
AFIRKAA biittan deꞌiya asay ubbay Xoossau goynniyoogee keehi koshshiyoogaa maayees gaana danddayettees. SHin ayyo goynniyo ogiyaa xeelliyaagan maayettokkona. Issoti issoti masggidiyan goynnoosona; harati qassi eeqau goynniyo sohuwaa boosona. Harati qassi woosa keetta boosona. SHin Afirkkan heezzu haymaanoote xallay deꞌees gi qoppiyoogee likke gidenna. Isilaama haymaanootiyan deꞌiya higgeenne ammanoy dumma dumma. Eeqa goynoy daro sohuwan heeraappe heeran dumma. Kiristtaane geetettiya daro haymaanootetunkka hegaappe aadhiya ogiyan issippetetti baawa. Waanna geetettiyaageeta gujjennan, shaꞌan qoodettiya dumma dumma woosa keettati Afirkkan deꞌoosona.
Nu Haymaanootee Tuman Baasettidaagaa Gidana Bessees
2. (a) Darotoo issi uri haymaanootiyaa kaallanaadan oottiyaabay aybee? (b) Issi haymaanootee Xoossaa ufayssiyaagaa gidiyoogau aybi naqaasha gidennee?
2 Asay ba goynniyoogaadan goynniyoy aybissee? Daroti banttana yelidaageetu haymaanootiyaa kaalloosona. Daro wodiyaappe kase hanettidabay ha wodiyan asay kaalliyo haymaanootiyaakka bochiis. Zi Afrikans—E Tripil Heeritej giyo maxaafay: “Saharappe (huuphessa bagga Afirkkan deꞌiya aaho bazzuwaa) huuphessa biittatun Isilaama haymaanootee olan aakkiis; . . . Sahaarappe tohossa bagga biittatun qassi Kiristtaane haymaanootee hegaadan aakkiis. Sahaarappe huuphessa bagga biittatun Isilaama haymaanootee bisuwan aakkidaba gidikko, Sahaarappe tohossa bagga biittatun Kiristtaane haymaanootee zayyiyan aakkiis” yaagees. Gidikkonne, daro asay ba haymaanootee Xoossaa ufayssees giidi ammanees. SHin so asaappe laattidoba, woykko issi allaga aysoy wolqqanttin mayzza aawati kaallidoba gidiyoogaa xallay issi haymaanootiyaa tuma oottenna.
3-5. Ubba haymaanootee tumaa tamaarissennaagaa akeekanau nuna maaddiya leemisoy awugee?
3 Xoossau oottiyoogaa xeelliyaagan ubba haymaanooteti ammanttiya kaaletuwaa immiyaabadan yootiyaaba gidikkonne, eta qofay dumma dumma. Xoossaa oonatettaanne i nuuppe koyiyoobaa xeelliyaagan eti dummatettay deꞌiyo darobaa tamaarissoosona. Issibaa qoppa: Neeni issi gita dirijjitiyan oosuwaa demmadasa goos. Neeni oosuwaa doommido gallassi, dirijjitiyaa alaafee adussa wodiyau shemppuwau kiyidoogaa siyadasa. Hegaa gishshau, neeni oottana koshshiyaabaa heezzu oosanchata oychaasa. Koyroogee, neeni wuygiyaa pittanaadan alaafee koyiyoogaa yootees. Naaꞌꞌanttoy, neeni keettaa qalamiyaa tiyana koshshiyoogaa yootees. Heezzanttoy, neeni dabddaabbiyaa asau gishanaadan yootees.
4 Hegaappe simmin, he oosanchata alaafiyaabaa oychaasa. Koyroogee, alaafee adussa, yelaga, qassi qareti baynnaagaa gidiyoogaa yootees. Naꞌꞌanttoy, i qantta, cima, qassi keha gidiyoogaa yootees. Heezzanttoy qassi, alaafee attuma asa gidennan macca asa gidiyoogaa yootees. Heezzu oosanchati yootidobay ubbay tuma gidennaagaa kuuyennan aggakka. Neeni demmido oosuwan takkanau koyikko, alaafee oonakko, qassi i woy a neeni ay oottanaadan koyiyaakko qorada shaakka erennan aggakka.
5 Hegee haymaanootiyaukka oottiyaaba. Xoossaa oonatettaanne i nuuppe koyiyoobaa xeelliyaagan daro qofay deꞌiyo gishshau, nu goynoy tumaara moggottiyaakkonne shaakki erana koshshees. SHin Xoossaabaa tumaa waati erana danddayiyoo?
Hageeta Beꞌadii?
GEESHSHA MAXAAFAABAA OYCHCHIYOOBATU ZAARUWAA
Haymaanooteti Ubbay Issi Malee? Eti Ubbay Xoossaakko Gattiyoonaa?
Geeshsha Maxaafay qonccissiyo naaꞌꞌubati he oyshaa zaaroosona.
WOCHCHIYO KEELAA
