1. Nuuni ‘Xoossaakko shiiqiyaaba’ gidikko, aybi hanaanee?

 YIHOOWAY baassi oottiyaageeta siiqees. Neeni Yihoowayyo goynniyaaba gidikko, i nena haꞌꞌinne sinttappenne anjjana. Geeshsha Maxaafay: “Xoossaakko shiiqite; ikka inttekko shiiqana” yaagees.—Yaaqooba 4:8.

2. Nuuni Xoossaakko waanidi shiiqana danddayiyoo? Hegee nu woosan waanidi maaddiyaaba gidii?

² Xoossaakko shiiqanau, neeni a Qaalaa xannaꞌanaunne oosuwan peeshshanau bessees. Neeni Yihoowa sheniyaara moggiya woosaa woossiyo wode, i ne woosaa siyeesinne hegau zaaruwaa immees. Kiitettida Yohaannisi: “Xoossai koyiyoogaadan, ainne nuuni a woossikko, i siyiyoogaa nuuni eriyo gishshau, a sinttan yayyokko. Nuuni woossiyo ubban i siyiyoogaa erikko, nuuni a woossidoogaa i immanaagaa eroos” yaagidi xaafiis.—1 Yohaannisa 5:14, 15.

3-7. Nuuni Xoossay immiyo aadhida eratettaa waatidi demmana danddayiyoo? Hegee nuna waatidi maaddana danddayii?

³ Gujjidikka, neeni Xoossaakko shiiqiyo wode, deꞌuwan galla galla gayttiyaabaa muruta ogiyan oyqqanaadan neeyyo aadhida eratettaa i immana. Geeshsha Maxaafay: “Intteppe ooninne baayyo aadhdhida eratettai xayikko, . . . Xoossaa woosso” yaagees.—Yaaqooba 1:5

⁴ Xoossay immiyo aadhida eratettay nena waatidi maaddana danddayii? Issi ogee, Yihoowa ufayssennabata neeni eranaadan maaddana danddayiyoogaa. Hegaa malabati likke gidennay aybissakkonne hegaa malabaa oottiyoogaappe neeni waana haakkana danddayiyaakkokka, erana danddayaasa. Hegaa mala eray daro asaa qohiya daro metotuppe nena teqqana danddayees. Leemisuwau, kandduwan geeshsha gidanaadan maaddiya Xoossaa zoriyau azazettiyoogee koyennan shaahariyoogaappe, ashuwaa gaytotettan oyqqiya harggiyaappenne ufayssi baynna aqo deꞌuwaappe woy aqoy laalettiyoogaappe Xoossaa asaa naagees.

⁵ Xoossay immiyo aadhida eratettay nena maaddiyo hara ogee aybee? Neeni deꞌuwan keehippe ufayttanaadan oottees. Hegee miishshaa oyqqiyo ogiyaa malatiya hanotan neeni aadhida eratettan kuuyanaadan maaddana danddayees. Neeni goꞌꞌenna hoolliyaa aggada goꞌꞌiya hoolliyaa kaallana danddayaasa.

⁶ Xoossay immiyo aadhida eratettay haratuura deꞌiya gaytotettankka nena maaddana danddayees. Ufayttiya keetta asay deꞌanaadan oottees. Haratuura duuxxenna tumu dabbotaa medhana danddayaasa; qassi Xoossau oottennaageetikka nena bonchana danddayoosona.

⁷ Gujjidikka, neeni Xoossay immiyo aadhida eratettaa demmiyoogee deꞌuwau loꞌꞌo xeelay deꞌanaadan oottees. Neeni deꞌuwan gayttiya metuwaanne hidootaa qanxxissiyaabaa xoonada kiyanaadan maaddees. Qassi sinttanaa wodiyaa xeelliyaagan neeyyo loꞌꞌonne bessiya xeelay deꞌana. Loꞌꞌo xeelay, neeni qofaaninne asatettan payya gidanaadan oottees.—Leemiso 14:30; Isiyaasa 48:17.

8. Neeni Xoossau oottiyaaba gidikko, nena aybi yashshennee?

 ⁸ Neeni tumu Xoossau oottiyaaba gidikko, ayyo oottennaageeta hirggissiya yashshaappe naxa kiyaasa. Hayqqidaageetuyyo deꞌoy baynnaagaa neeni eriyo gishshau, etayyo yayyakka. Xoossay hayquwaappe denttanaagaa ammanettiyo gishshau, hayquwaa yayyakka. Xoossay ubbaappe aadhiya wolqqaama gidiyoogaa neeni eriyo gishshau, bitaa woy murunnuwaa yayyakka.—Yohaannisa 8:32.

9-11. Gannatiyan deꞌanay oonee? Deꞌennayshin oonee?

⁹ Neeni Xoossaakko shiiqiyaaba gidikko, sinttanaa wodiyaa yayyakka. Nuuni beꞌidoogaadan, ha wodiyan saꞌan deꞌiya daro metuwaa Geeshsha Maxaafay kaseti yootiis. Ha metoy guutta wodiyaassa gidiyoogaa Yihooway nuussi yootees; Xoossaa Kawotettay matan ha saꞌaa gannate oottana.—Luqaasa 21:10, 11, 31; 23:43.

¹⁰ Yihoowakko shiiqiyaageetunne ayyo oottiyaageetu xallay Gannatiyan deꞌana. Geeshsha Maxaafay: “Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana” yaagees.—Mazamure 37:10, 11.

¹¹ Xoossaa geeshsha higgiyaa azazettanau ixxis giyaageeti merinau xayana. (2 Tasalonqqe 1:8, 9) Hegaappe simmin eti deꞌokkona. Eti Seexaanaaranne daydanttatuura merinau xayana. (Ajjuutaa 20:10, 14) SHin Yihoowabaa tamaariyaageetinne ayyo oottiyaageeti Gannate saꞌan keehippe ufayttana.

12. Geeshsha Maxaafay sinttanaa wodiyaabaa woygii?

¹² Yihooway bana siiqiyaageetuyyo maalaalissiyaabaa giigissi wottiis! Gannate saꞌan deꞌoy ay mala gidanaakko a Qaalay yootiyoobaa beꞌa:

•   Miyo qumay gidi palahana: “Biittan daro kattai mokko; dereti kattan kamettona.”—Mazamure 72:16.

•   Injje keettaa: “Asati keettata keexxidi, etan de7ana”—Isiyaasa 65:21.

•   Ufayssiya oosuwaa: “Taani dooridoogeeti bantta adussa wodiyau bantta kushiyaa oosuwan ufaittana. Eti coo daafurokkona.”—Isiyaasa 65:22, 23.

•   Harggee deꞌenna: “[Yan] de7iya ooninne, ‘Taani harggais’ yaagenna.”—Isiyaasa 33:24.

•   Paca bolli deꞌiyo uri deꞌenna: “He wode, qooqetu aifee dooyettana; tulletu haittaikka siyana. Wobbeti genessadan guppana; duudetikka ufaissan yexxana.”—Isiyaasa 35:5, 6.

•   Sahoy, kayyoy, hayqoy deꞌenna: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajjuutaa 21:4.

•   Oli deꞌenna: “[Xoossay] sa7aa gaxaa gakkanaassi de7iya olaa teqqees.”—Mazamure 46:9.

•   Merinaa deꞌuwaa: “Xilloti biittaa laattananne yan merinau de7ana.”—Mazamure 37:29.

13. Ha saꞌaa gannate oottanau danddayiyay o xallee? Aybissi?

¹³ Hagaa malabaa asi mule ehaana danddayenna; shin Yihooway oottana giido aybakka oottanau au wolqqay deꞌees. I oottanau koyiyoobaa diggana danddayiya ooninne deꞌenna. Geeshsha Maxaafay, “Xoossaassi danddayettennabi” baynnaagaa yootees.—Luqaasa 1:37.

14. Neeni merinaa deꞌuwau kaalettiya ogiyaa waatada demmana danddayay?

¹⁴ Yihooway ba Markkatu baggaara ubbasan deꞌiya asay ‘unꞌꞌo penggiyaara gelanaadaaninne’ merinaa deꞌuwau kaalettiya ogiyan hemettanaadan injjiyaa medhiiddi deꞌees. He shoobiyaa ekkidi ufayttiya asatu giddon neeni deꞌnaadan nuuni amottoos. Neeni tumu hamaanootiyaa kaalliyaagaanne merinau Yihoowa anjjuwaa demmiyaagaa gidanaadan amottoos!—Maatiyoosa 7:13, 14.