Yarkko katamaabaa odoy Kanaanen deˈiya hara biittaa gakkiis. Eta kawoti issippe gididi Israaˈeelata olanawu qofaa qachidosona. SHin Gabaaˈoonati harabaa qoppidosona. Eti wurida maayuwaa maayidi, Yaasukko yiidi hagaadan giidosona: ‘Nuuni haaho biittappe yiida. Yihooway inttessi Gibxxe biittaaninne Moˈaaba biittan oottido ubbabaa nuuni siyida. Nuna qohennan agganawu qaalaa gelite; nuuni intteyyo ashkkara gidana.’

Yaasu eti yootiyoobaa ammanidi eta qohennan agganawu maayiis. Heezzantto gallassaappe guyyiyan, ha asati haaho biittappe yibeennaagaa i siyiis. Eti Kanaane biittaappe yiidosona. Yaasu Gabaaˈoonata, ‘Intte nuussi ayssi worddotidetii?’ yaagidi oychiis. Oychin eti hagaadan giidosona: ‘Nuuni yayyida! Intte Xoossay Yihooway intteyyo olettiyoogaa nuuni eroos. Hayyanintta nuna woroppite.’ Yaasu ba gelido qaalaa naagiis; qassi eti deˈanaadan aggiigiis.

 Daro takkennan, Kanaane biittaa kawoti ichashatinne eta olanchati Gabaaˈoonata olanawu denddidosona. Yaasunne a olanchati qamma kumettaa hemetti biidi eta ashshidosona. Olay wonttetta galla maallado guuran doommiis. Kanaaneti ubbasaara baqatiyoogaa doommidosona. Yihooway eti baqatiyo ubbasan saluwaappe wolqqaama shachay eta bolli wodhanaadan oottiis. He wode Yihooway awa ayfee wullennan takkanaadan oottana mala Yaasu a oychiis. Awa ayfee hegaappe kase wullennan mule takki erennaba gidikko, Yihooway hegaadan oottanaadan Yaasu ayssi oychidee? I Yihoowan ammanettiyo gishshataassa. Israaˈeelati Kanaane kawotanne eta olanchata xoonana gakkanaassi awa ayfee gallassa kumettaa wullennan takkiis.