Yihooway Sameela, ‘Isseya soo ba. A naatuppe issoy Israaˈeelan kawo gidana’ yaagiis. Yaatiyo gishshawu Sameeli Isseya soo biis. I bayratiya attuma naˈaa beˈido wode, ‘Ha yelagay a gidana bessees’ yaagidi qoppiis. SHin Yihooway hegee a gidennaagaa Sameelawu yootiis. Yihooway, ‘Taani issi urawu wozanan deˈiyaabaa xeellaysippe attin, meraa xeellikke’ yaagiis.

Isseyi hara usuppun attuma naata Sameelakko ehiis. SHin Sameeli, ‘Yihooway etappe oonanne dooribeenna. Neeyyo hara attuma naati deˈiyoonaa?’ yaagiis. Isseyi, ‘Daawita giyo, ubbaappe kaalo naˈay tawu deˈees. I ta dorssata heemmees’ yaagiis. Daawiti soo yin, Yihooway Sameela, ‘Hagee a!’ yaagiis. Sameeli Daawita huuphiyan zaytiyaa tigidi, i sinttappe Israaˈeela kawo gidanaadan tiyiis.

Guutta wodiyaappe guyyiyan, Israaˈeelati Pilisxxeematuura olettidosona, he wode wolqqaama olanchay Gooliyaadi Pilisxxeematuyyo olettees. Galla galla Gooliyaadi Israaˈeelata baceessees. I hagaadan giis: ‘Tanaara olettanawu issi uraa taakko kiittite. I xoonikko, nuuni intte ashkkarata gidana. SHin taani xoonikko, intte nu ashkkarata gidana.’

Wotaaddara gidida ba ishanttussi qumaa ekkidi Israaˈeela olanchati dunkkaanidosaa Daawiti biis. I Gooliyaadi giyoobaa siyidi, ‘Taani aara olettana!’ yaagiis. Kawuwaa  Saaˈooli, ‘Neeni guutta naˈa’ yaagiis. Daawiti zaaridi, ‘Yihooway tana maaddana’ yaagiis.

Saaˈooli ba olaa miishshaa Daawita oyttanawu maliis; shin Daawiti, ‘Taani ha olaa miishshan olettana danddayikke’ yaagiis. Daawiti ba yambbarshshaa oyqqidi shaafaa biis. I ichashu muyla shuchaa ekkidi qarcciitan yeggiis. Yaatidi Daawiti Gooliyaadakko woxxiiddi biis. Gooliyaadi, ‘Guutta naˈawu, haaya. Saluwaa kafotinne doˈati nena maanaadan taani oottana’ yaagiis. Daawiti yayyibeenna. I zaaridi hagaadan giis: ‘Neeni bisuwaanne tooraa oyqqada yaasa; shin taani Yihoowa sunttan yays. Neeni olaa olettiyoy nunaara gidenna; neeni Xoossaara olettaasa. Hagan deˈiya ubbay Yihooway bisuwaappe woy tooraappe keehi wolqqaama gidiyoogaa beˈana. I inttena ubbaa nu kushiyan aatti immana.’

Daawiti ba qarcciitaa giddoppe shuchaa yambbarshshan wottidi bawu deˈiya wolqqa ubban yambbariis. Yihooway maaddin, yeddido shuchay Gooliyaada somˈˈo giddo geliis. Ha wolqqaamay biittan kunddidi hayqqiis. Yaatin Pilisxxeema asati bantta shemppuwawu baqatidosona. Daawitaagaadan, neeni Yihoowan ammanettay?