Kawuwaa Akaabi Iziraaˈeelan ba kawo keettaa maskkootiyaara, Naabuta giyo bitaniyaa woyniyaa gadiyaa beˈana danddayees. Akaabi he gadiyaa koyido gishshawu, Naabuteppe shammanawu maliis. SHin Laata gadiyaa bayzziyoogee Yihoowa Higgiyaa kanttiyoogaa gidiyo gishshawu, Naabutee gadiyaa ayyo bayzzennan ixxiis. Naabutee suurebaa oottidoogawu Akaabi a bonchidee? CHii. Akaabi hanqquwaa suulliis. I keehi yiillotidi ba aqiyo kifiliyaappe kiyennaaninne qumaa meennan ixxiis.

A machiyaa, iita Kawiyaa Elzzaabeela ayyo hagaadan gaasu: ‘Neeni Israaˈeela kawo. Neeni koyiyo aybanne ekkana danddayaasa. Ne he gadiyaa ekkanaadan ta oottana.’ Elzzaabeela katamaa cimati naabutee Xoossaa cayiis gi mootidi a shuchan caddidi woranaadan etawu dabddaabbiyaa xaafaasu. Cimati a yootidoogaadan ootti simmin, a Akaaba, ‘Naabutee hayqqiis. Woyniyaa gadee neegaa’ yaagaasu.

Elzzaabeela worido suure asi Naabute xalla gidenna. A Yihoowa siiqiya daro asaa woraasu. A eeqawu goynnaasu; qassi hara iitabaa oottaasu. Elzzaabeela oottido iitaba ubbaa Yihooway beˈiis. Yaatin i o waatanee?

Akaabi hayqqin, a naˈay Yoraami kawotiis. Yihooway Elzzaabeelonne i soo asaa qaxxayanawu Yeeha kiittiis.

Yeehu ba paraa gaariyan, Elzzaabeela deˈiyo Iziraaˈeela biis. Yoraami Yeehuura gayttanawu paraa gaariyan yiidi, a, ‘Nu giddon sarotetti deˈennee?’ yaagiis. Yeehu, ‘Ne aayyiyaa, Elzzaabeela iitabaa oottishin, saroy baawa’ yaagiis.  Yoraami ba paraa gaariyaa guyye zaaridi baqatanawu maliis. SHin Yeehu wonddafiyaa dukkin, Yoraami hayqqiis.

Yaatidi, Yeehu Elzzaabeeli kawo keetti biis. A i yiyoogaa siyada, tiyettadanne pixettada, ba pooqiyaa maskkootiyaara naagawusu. Yeehu gakkido wode, a Yeeha karada sarotaasu. Yeehu i matan eqqida i ashkkarata, “O duge oli aggite!” yaagiis. Eti Elzzaabeelo maskkootiyaara kare sugin, a saˈan kunddada hayqqaasu.

Hegaappe simmin, Yeehu Akaaba 70 attuma naata woriis; qassi biittaa Baˈaala goynuwaappe geeshshiis. Yihooway ubbabaa eriyoogaanne iitabaa oottiyaageeta bessiya wodiyan qaxxayiyoogaa neeni akeekadii?