Seexaanaynne daydanttati asaa hegaa keena balettanau baaxettiyoogee aybissee? Etadan nuunikka makkalanaadan koyiyo gishshataassa. Nuuni etayyo goynnanaadan koyoosona. Nuuni eta wordduwaa ammananaadaaninne Yihooway dossennabaa oottanaadan koyoosona. Hagaa mala oosotuppe daroti hayqqida asaara oyqettida meezetuura gayttidabata.

Siiqiyo ura hayqoy, keehippe kayyoyiyaba; azzaniyoogeekka oorattabanne bala gidenna. I siiqiyo Alꞌaazari hayqqin Yesuusi “afuxxiis.”—Yohaannisa 11:35.

Saꞌa yuusho ubban hayquwaara oyqqettidaagan daro dumma dumma meezeti deꞌoosona. Daroti Geeshsha Maxaafaa baaso maaraara domꞌettokkona. Gidikkokka, issi issi meezeti, hayqqidaageeti paxa deꞌoosonanne deꞌuwan deꞌiyaageetakka beꞌana danddayoosona yaagiyo qofan baasettidosona. Ahaa lanqqiyan aqiyoogee, wozanaa bayidi kayyottiyoogeenne, zawi baynna aaho baliyaa kessiyoogee ubbay doommidoy hayqqidaageetu ayyaanaa azzanttanaappe giyo yashshaana. SHin hayqqidaageeti ‘aibanne erenaba’ gidikko hegaa malaba oottiyaageeti Seexaanaa wordduwaa aassoosona.—Eranchchaa 9:5.

Hara meezeti woykko bonchchiyo gallassati doommidoy, hayqqidaageeti paxa deꞌiyaageetu  maaduwaa koyoosonanne, paxa deꞌiyaageeti hayqqidaageeta ufayssiyaabaa polana xayikko qohoosona giyo ammanuwaappe. Issi issi biittan hayqqida uraayyo 40ta gallassan woykko issi layttaappe simmin taskkaaraynne yarshshoy giigees. Hagee hayqqida uraa, ayyaana alamiyau ‘pinnanaadan’ maaddees geetettidi qofetees. Hara erettida meezee, hayqqidaageetussi qumaanne ushshaa wottiyoogaa.

Hagee ubbaykka hayqqida asaa xeelliyaagan Seexaanaa wordduwaa aassiyo gishshau bala ooso. Yihooway, nuuni ay ogiyankka daydanttatu timirttiyan baasettida meeziyaara oyqettida oosuwan shaalettin ufayttanee? Mulekka ufayttenna!—2 Qoronttoosa 6:14-18.

Tumu Xoossau haggaazziyaageeti Seexaanaa wordduwaa kaafiya ay oosuwaninne shaahettokkona. Hegaappe dumma ogiyan, eta qofissiyaabay deꞌuwan deꞌiya asaa siiquwan maaddiyoogaanne minttettiyoogaa. Issi uri hayqqidaba gidikko, a maaddana danddayiyay Yihoowa xalaala gidiyoogaa eroosona.—Iyyooba 14:14, 15.

Issi issi asay daydanttatuura bantta huuphe woy ayyaanaa xeegiya asa baggaara gayttoosona. Hegee iita ayyaanatuura gayttiyoogaa geetettees. Iita ayyaanatuura gayttiyo ogetuppe amaridaageeti shareechchiyoogaa, daggamiyoogaa, murunniyoogaanne hayqqida asaa ayyaanaa xeegiyoogaa.

Geeshsha Maxaafay “Bitiyaabi, maracce xeeliyaabi, murunniyaabinne qaadaa odiyaabi,. . . daggamiyaagee, ayyaanata xeegiyaagee shareechchiyaageenne hayqqida asaa ayyaanaa xeegiyaagee intte giddon de7oppo. Hegaa malabaa oottiya ai asinne GODAA matan ixettida asa” yaagidi minttidi yootees.—Zaarettido Wogaa 18:10-12.

Yihooway ha oosotuppe naagettanaadan nuna minttidi akeekissiyoy aybissee?

Yihooway iita ayyaanatuura gayttiyo oge ubbaappe naagettanaadan nuna akeekissiyoy nu  goꞌꞌaassa. Asaa siiqessinne etau loꞌoba qoppees; qassi daydanttatuura gayttotetta medhdhiyaageeta waayee gakkiyoogaa erees.

Hegaa malabay gakkidoogeetuppe issina, Biraazila biittan deꞌiya iita ayyaanaa xeegiya Nilddo. Daydanttati i deꞌuwa tuggay kummidoogaa oottidosona. Babaa yootayida: “iita ayyaanati . . . tana oyqqogaappe guyyiyan, tana bantta dosaadan oottiyoogaa doommidosona. Issi wode tana muleera dogayiis, hara wode qassi payya asa kiyayiis; hegaappe denddidaagan wozanaa baqettada hosppittaliyaa gelaas. Daydanttati tana keehi barchchiya bessido gishshau ta nerbeeti (nerves) qohettidosona. Ubba wode xiskkissiya xalliya mittiyoogaa, ushshaa uyiyoogaanne sijaaraa uyiyoogaa doommaas. Hegaadan daro layttatuyyo takkaas.”

Guyyeppe, Yihoowaynne saꞌan deꞌiya a markkati maaddin, Nildda daydanttatu qohuwaappe sarotettaa demmada haꞌi loꞌꞌonne woppa duussaa deꞌausu. “Asay oonikka gidin [iita] ayyaanatuura, mexi issito gidiyaba gidikkokka gayttotettaa medhdhenna mala minttettayiis” yaagausu.