Ayyaanati deꞌoosona! Ayfiyan beettenna ayyaana alamiyaa giddon, iita ayyaanatinne loꞌꞌo ayyaanati deꞌoosona. Eti saꞌan deꞌidi hayqqida asateeyye?

CHii, gidokkona. daro asay qoppiyoogaadan, Issi asi hayqqiyo wode, i woy a ayyaana alamiyaa pinnokkona. Hagaa nuuni aybin eriyoo? Geeshsha Maxaafay hegaadan odiyo gishshaassa. Geeshsha Maxaafay  tuma gidida maxaafanne sunttay Yihoowa gidido issi tumu Xoossaappe yiidaba. Yihooway asaa medhdhiis; eti hayqqiyo wode waaniyakkokka  loyttidi erees.—Mazamure 83:18; Kessaabaa 6:3 (1879 M.L Amaarattuwan attamettidaagaa) 2 Ximootiyoosa 3:16.

Geeshsha Maxaafay Xoossay, koyro asa Addaama “biittaa baanaappe medhdhiis” yaagees. (Doomettaabaa 2:7) Xoossay Edene giyo ataakiltte sohuwan, Gannatiyaan a wottiis. Addaamee Yihoowa higgiyaa azazettidaba gidiyaakko, i hayqqennan, ha wode gakkanaashin saꞌan deꞌanau danddayees. SHin Addaamee eriidi Xoossaa higgiyaa azazettennan ixxido wode, Xoossay ayyo: “Neeni biittaappe ekettadasa; neeni baana; neeni  baanau simmana” yaagiis.—Doomettaabaa 3:19.

Hagaa giyoogee woyigiyoogee? Yihooway a baanaappe medhdhanaappe kase Addaamee awan deꞌii? I awankka baawa. I yelettibeenna ayyaana gididi saluwaan deꞌibeenna. Addaame merettanaappe kase deꞌibeenna. Yaatiyo gishshau, Yihooway Addaama “biittau simmaasa,” giido wode Addaamee hayqqiyoogaa yootiis. I ayyaana alamiyaa pinnibeenna. Hayqqido wode, Addaamee wodhdhi eqqidi deꞌoy baynnabanne deꞌennaba gidiis. Hayqo giyoogee deꞌuwan deꞌennaagaa giyoogaa.

Gido shin hara hayqqidaageetubaa woyiganee? Etikka deꞌuwaan deꞌokkonaa? Geeshsha Maxaafay zaaruwa immees:

• “Eti naa77aikka [meheenne asay] issi sohuwaa boosona; naa77aikka biittaappe merettido gishshau, biittau simmoosona.”—Eranchchaa 3:20.

• “Hayqqidaageeti. . .aibanne erokkona.”— Eranchchaa 9:5.

• “Eta siiqoi, ixoinne qanaatee ubbai etaara issippe xayiichchiis.”— Eranchchaa 9:6.

• “Neeni baanasan duufuwan oosoi, woikko halchchoi,woikko eri, woikko aadhdhida eratetti baawa.”— Eranchchaa 9:10.

• “Eti biittau simmoosona; eta halchchoi ubbai he gallassikka atti aggees.”—Mazamure 146:4.

 Ha xiqisseta ammananau deexii? Deexiyaaba gidikko, ane hagaa qoppa: daro so asayyo, son koshshiyaaba kunttanaayo miishshaa ehiyaagee attumaaga. I hayqqiyo wode, a so asay daroto metuwan kunddoosona. Issito issito a keettayessinne naatussi kaattaa shammanau gidiya miishshikka ubba baawa. Geelladan bitaniyaa morkketi eta qohana danddayoosona. Ane haꞌꞌi nena oychcha: ‘he bitanee ayyaana alamiyan deꞌikko, ba soo asaayyo koshshiyaaba ayssi kunttenee?’ I ba soo asaa iita asaappe ayssi naagenee? Hagee hanoogee xiqisseti tuma gido gishshaasa. He bitaniyaayyo deꞌoy baawa, aybanne oottanau danddayenna.—Mazamure 115:17.

Hagaa giyoogee hayqqidaageeti sinttanau mule deꞌuwau simmidi yookkona yaagiyoogee? Akkay, yaagiyoogaa gidenna. SHin hayqqida asati haꞌꞌi neeni oottayida deꞌiyoobaa erokkona yaagiyoogaa. Nuuni simmidi dendduwaabaa haasayana. Eti nena beꞌanau, ne giyooba siyanau, woy nenaara haasayanau danddayokkona. Neeni eta yayyanau koshshenna. Eti nena maaddanaunne qohanau danddayokkona.— Eranchchaa 9:4; Isiyaasa 26:14.