Nu ubbaayyo issi dooroy deˈees. Yihoowaayyo haggaazzetees woy ixxikko Seexaanaayyonne daydanttatuyyo haggaazzetees. Naaˈˈau oottana danddayokko. Yihoowaayyo haggaazziyoogee ay keena eratetee!

Nu beˈidoogaadan, daydanttati asaa qohiyoogaaninne balettiyoogan ufayttoosona. Yihooway hegaa mala gidenna. I ba naata siiqiya aawadan asaa naata siiqees. I ‘Loˈˈo imo ubbaanne kumetta woito ubbaa’ Immiyaagaa. (Yaaqooba 1:17) A daro waagaa qanxxissiyaaba gidikkokka, asaa naata loˈˈoba diggenna.—Efisoona 2:4-7.

Saˈaa bollan, Xoossaa naˈaa Yesuusan oosettidabata qoppite. Duudeti haasayanaadaaninne qooqidaageeti xeellanaadan oottiis. Inchchirichchay oyqqidoogeetanne wobbiya asaa pattiis. Daydanttata kessiisinne ubba qommo harggiyaa pattiis. Yesuusi Xoossaa wolqqaan, haray atto hayqqidaageetakka denttiis.—Maatiyoosa 9:32-35; 15:30, 31; Luqaasa 7:11-15.

Wordduwa yootiyoogan nuna baleettiyoogaappe, Xoossay ubbato tumaa yootees. I oonanne mule cimmenna.—Qoodaabaa 23:19.

Shararootiya keettay udunxxiya qirphphi ootti oyqqiyoogaadan, miilooniyan qoodettiya asaakka malan ammaniyoogeenne worddoy qachchi oyqqiis. Hayqqida asaa yayoosona. Iita ayyaanata yayoosona. Qanggettaa, malaa, kitaabaanne iita ayyaana wolqqay deˈees giyoobata yayyoosona. Seexaanaa wordduwan baasettida ammanotuninne meezetun direti uttidosona. Xoossaayyo haggaazziyaageeti hagaa mala ayba oosuwankka oyqetibookkona.

Yihoowassi Seexaanaagaappe keehi daro wolqqay deˈees. Neeni Yihoowaayyo haggaazziyaaba gidikko, i nena iita ayyaanaappe naagana. (Yaaqooba 4:7) Bitay ne bolli gakkenna. Leemisuwassi, Naayjeeriyan, heezu wolqqaama shareechchoti katamaappe beennan ixxida issi Yihoowa Markka woranau bitaa bitidosona. Bitay a bolli gakkennan ixxini, shareechchotuppe issoy yayyidi, he Markkaakko yiidi i oottidobaa atto gaana mala woossiis.

Dayddanttati nena wayssikko, Yihoowa suntta xeesana danddayaasa; ikka neena naagana. (Leemiso 18:10) SHin Xoossay nena naaganaadan koyiyaaba gidikko, iita ayyaanatuura gayttiyoogaanne dayddanttatuyyo goynniyoogaara oyqettidabaa muleera agganau koshshees. Beni Efisoonan deˈiya Xoossau goynniyaageeti hegaato oottidosona. Bantta kayiyo maxaafaa ubbaa shiishshidi xuuggidosona. (Oosuwaa 19:19, 20) Ha wodiyankka Xoossaayyo haggaazziyaageeti hegaato oottana bessees. Kitaabaappe, yeleelluwaappe, iitabaappe “naagoosona” giyoobatuppe, kayiyo maxaafaappenne iita ayyaana oosuwaara oyqettidabaappe nena kessa.

Xoossaa ufayssanau koyikko, worddo goynuwaappe haakkiyoogeenne iita oosuwaa aggiyoogaa xalaalay gidenna. Tumu goynuwau bessiyaaba aggennan oottanau bessees. Geeshsha Maxaafay hegau aybi koshshiyaakko yootees:

Seexaanaasinne daydanttatussi saˈaa bollan iitabaa tamaarissiyanne oottiyaa asati deˈoosona. Gidoppe attin Yihoowassikka oottiya asati deˈoosona. Eti Yihoowa Markkata. (Isiyaasa 43:10) Usuppun miilooniyaappe dariya Markkati saˈa yuushuwan deˈoosona. Eti ubbay loˈˈobaa oottanau baaxettoosonanne asaa tumaa tamaarisoosona. Daro biittan Kawotettaa Adaraashshan etaara gayttana danddayaasa, eti ufayssan nena mokkana.

Eta oosoy haraati Xoossaayyo haggaazzana mala maaddiyooga. Neeni tumu ogiyan Yihoowassi waatada goynnanaakko erana mala nena eti ne son Geeshsha Maxaafaa xannaˈissanau koyoosona. Hegaassi miishsha qanxxakka. Markkati asaanne Xoossaa Yihoowa siiqiyo gishshatau ufayttidi tumaa tamaarisoosona.