Ane nuuni Yarkko kataman deꞌiyaabadan qoppoos. He katamay Kanaane biittan deꞌees; he biittaa asay Yihoowa ammanenna. Raꞌaabo geetettiya maccaasiyaa he kataman deꞌausu.

Raꞌaaba Muusee Zoꞌo Abbaa waati shaakkidaakko, qassi Israaꞌeelata kaalettidi Gibxxeppe waati kessidaakko naatettan siyaasu. Eti bantta morkketuura olettido olan xoonanaadan eta Yihooway waati maaddidaakkokka siyaasu. Qassi guyyeppe, Israaꞌeelati Yarkko matan dunkkaani uttidoogaa siyaasu.

Issi galla omarssi naaꞌꞌu Israaꞌeelati asi erennan Yarkko katamaa xomoosanau biidosona. Eti Raꞌaabi soo biidosona. A ba son eti aqanaadan shoobbaasu. He galla qammi, Yarkko kawoy xomoosiyaageeti he katamaa gelidoogaanne eti Raꞌaabi soo biidoogaa eriis. Yaatiyo gishshau, eta oyqqana mala asaa kiittiis. Raꞌaaba naaꞌꞌu xomoosiyaageeta ba son shakkuwan qottada kawoy kiittidoogeetussi hagaadan gaasu: ‘Ee asati taakko yiidosona; shin katamaappe kiyidi biidosona. Ellelli kaalliyaabaa gidikko, intte eta oyqqana.’ Raꞌaaba xomoosiyaageeta qottidoy aybissakko eray?— A Yihoowa ammaniyo gishshataassanne i Kanaane biittaa Israaꞌeelatussi immanaagaa eriyo gishshataassa.

Xomoosiyaageeti Raꞌaabi sooppe baanaappe kase, Yarkko katamay xayiyo wode onne i soo asaa ashshanau qaalaa gelidosona. Eti ay oottanaadan iyyo yootidaakko eray?— He asati o, ‘Ha zoꞌo wodoruwaa maskkootiyan qacha. Yaatikko, ne son deꞌiya asa ubbay attana’ yaagidosona. Raꞌaaba xomoosiyaageeti iyyo yootidoogaadan oottaasu. Hegaappe simmin aybi hanidaakko eray?—

Amarida gallassaappe simmin, Israaꞌeelati qaalanne qaattennan he katamaa yuuyidosona. Eti usuppun gallassi gakkanaassi galla galla he katamaa issitoo yuuyidosona. Gidoppe attin, laappuntta gallassi laapputoo he katamaa yuuyidosona. He wode eti ubbay bantta qaalaa xoqqu oottidi waassidosona. Yihooway katamaa  yuushuwan deꞌiya gimbbee laalettanaadan oottiis. SHin zoꞌo wodoroy maskkootiyan qashettido keettay qolettibeenna! Neeni hegaa misiliyan beꞌay?— Raꞌaabanne i soo asay bashshaappe attidosona!

Raꞌaabippe ay tamaarana danddayay?— Raꞌaaba Yihooway oottido maalaalissiyaabaa siyada a ammanaasu. Neenikka Yihoowabaa maalaalissiya darobaa tamaaraydda deꞌaasa. Raꞌaabigaadan neenikka Yihoowa ammanay?— Neeni ammaniyoogaa eroos!