Maykki ba aawaa hayquwaa hassayidi: “Azzaniyoogaa erissikke giyoogaappe denddidaagan, daro unˈˈettaas” yaagees. Maykki azzanuwaa mittidi deˈiyoogaa goobatettadan xeelliis. SHin guyyeppe i balidoogaa akeekiis. Hegaa gishshau, Maykka laggiyaassi aawaa aaway hayqqido wode, Maykki ay oottana bessiyaakko eriis. Hagaattuwa yaagees: “Amarida layttatuppe kase gidiyaakko, a hashshiyaa oyqqada ‘simi minna’ gaana shin.’ Haˈˈi a kushiyaa oyqqada, ‘Neessi siyettiyaaba oottanau guyye goppa. Azzanuwaappe minettanau hegee nena maaddana. Taani baanaadan ne koyidaba gidikko baana. Woy taani gamˈˈanaadan koyidaba gidikko gamˈˈana. SHin ne koyiyoobaa gaanau yayyoppa’” yaagaas.

Maaryanakka ba azinay hayqqo wode, azzanuwaa mittada deˈanau daro unˈˈettaasu. “Haraatuyyo loˈˈo leemiso gidanaagee tana keehi qofisso gishshau azzaniyoogaa erissana koyabeykke. SHin guyyeppe haraatu gishshau gaada tuussattuwaa mino milatanau koyiyoogee maaddibeenaagaa eraas. Ta hanotaa yiiga xeellada, tarkka tana ‘Nena yeekka yeekka giikko, yeekka. Keehi mino milatanau koyoppa. Yeekkada kessargga’” yaagaas.

Hegaa gishshau, Maykkinne Maaryana naaˈˈaykka: Intteyyo azzanoy siyettiyo wode teqqoppite! yaagidi zoroosona. Eti giyoogee likke. Ayssi? Kayyottiyoogee nu giddon siyettiyaabaa qonccissanau koshshiya oge. Siyettiya qofaa qonccissiyoogee, unˈˈissiya qofaappe woppissees. Siyettiya qofaa bessiya ogiyan qonccissiyoogaa bolli akeekaynne likke eray gujjettiyaaba gidikko, intteyyo siyettiyaabau suure qofay deˈanaadan oottees.

Ubba asay issi mala ogiyan azzanennaagee qoncce. Siiqiyo asi hayqqidoy qoppennan woy daro wodiyau harggidi gidiyoogee, paxa deˈiya uray kayyottiyo hanotan dummatettay deˈanaadan oottana danddayees. SHin issi erettidabay: michchishin mittidi aattiyoogee bollaaninne qofan qohuwaa gattana danddayees. Intte qoncciyan azzaniyoogee intte payatettau keehi loˈˈo. Hegaadan waati oottanee? Geeshsha Maxaafay oosuwan peˈana danddayiya issi issi zoriya oyqqiis.

Haasayiyoogee mishoy kiyanaadan maaddana danddayees. Beni wode deˈida Iyyoobi a naati tammaykka hayqqichchininne hara azzanttiyaabay gakki simmin “Taani ta de7uwaa karais! Hegaa gishshau, taani mootettanaappe attin, co77u  giikke; taani mishettada haasayais” yaagiis. (Iyyooba 1:2, 18, 19; 10:1) Iyyoobi ba mishuwaa erissennan deˈanau danddayibeenna. Qoncciyan kayyottiyoogaanne “haasayiyoogaa” koshshiis. Hegaara issi mala ogiyan, Inggilize biittan erettida xaafee, Shekkisppiri, Maakibez geetettiya draaman: “Ne kayyoy qonccanaadan ootta; qoncce gidenna kayyoy wozanay meqqanaadan oottees” yaagidi xaafiis.

Hegaa gishshau danddayan ezggiyanne minttettiya ‘tumu laggiyau’ yootiyoogee keehippe woppu oottees. (Leemiso 17:17) Hanettidabatanne siyettiyaabata qaalan qonccissiyoogee ha hanotata akeekanaadaaninne danddayidi deˈanaadan maaddees. Ezggiya uri kase dabboy hayqqin loˈˈo ogiyan minettidaagaa gidikko, intte mishuwaappe minettanaadan maaddiya zoriyaa immana danddayees. Naˈi hayqqido issi aayyiyaa, iigaa mala hanotay gakkido maccaasiyo haasayssidoogee, ay keena maaddidaakko odaydda: “Taagaa mala hanotay gakkido asi deˈiyoogaa eriyoogeenne mishuwaa danddaya aadhdhada, ba deˈuwaa a suure deˈiyoogaa eriyoogee keehi minttettiis” yaagaasu.

Inttessi siyettiyaaba denttidi haasayiyoogaa koyennaageeta gidikko shin? Saaˈoolinne Yonaataani hayqqin, Daawiti bau siyettiyaaba qoncciyan bessiya keehi yeessiya zilaassaa xaafidi giigissiis. Ha zilaassay guyyeppe Geeshsha Maxaafan, Naaˈˈantto Sameelan xaafettiis. (2 Sameela 1:17-27; 2 Hanidabaa Odiya 35:25) Hegaadankka, issoti issoti banttau siyettiyaabaa xaafidi qonccissiyoogee hara ogiyaappe loˈˈo gidiyoogaa akeekidosona. Azinay hayqqido issi maccaasiya, bau siyettiyaabaa ubbaa xaafada, amarida gallassappe guyyiyan nabbaboogaa yootaasu. Hagee minettanau maaddidoogaa akeekaasu.

Haasayiyoogan gidin xaafiyoogan, siyettiyaabaa qonccissiyoogee, intte mishuwoy kiyanaadan maaddees. Issi asa qofaa woy hanotaa bala ogiyan xeelliyoogaa teqqanaukka maaddees. Issi kayyottida aayyiya hagaadan gaasu: “Ta azinaynne taani, bantta naˈay hayqqi simmin paraman shaahettida azinaanne machchiyo eroos; hegaa malabay nuna gakkanaadan koyibookko. Yaatiyo gishshau, nu issoy issuwaa hanqqettiyo woy gaaso oottiyo wode, gamˈˈennan haasayidi wurssetees. Hegaadan oottiyoogan, nu giddon deˈiya dabbotettay minnidaba milatees. Yaatiyo gishshau, intte mishuwaabaa haasayiyoogee, issi yeehuwan inttenaara issippe mishettiya asati gakkida qohoy issi mala gidikkokka, eti kayyottiyo ogee dumma dumma gidiyoogaa akeekanau maaddees.

Hara mishuwaa kessiyo ogee yeekkiyoogaa. Geeshsha Maxaafay “Yeekkanau wodee de7ees” yaagees. (Eranchchaa 3:1, 4) Issi siiqiyo asa hayqoy hegaa mala wodiya ehiyoogee erettidaagaa. Kayyottidi afuxxiyoogee minettanau koshshiya oge.

Issi yelageessi aayyiya hayqqin, iyyo mata lagge gididaara o minnanaadan waata maaddakko odausu. “Ta laggiya taappe shaahettabuukku.  Tanaara issippe yeekkaasu. Tana haasayissaasu. Ta mishettoogee qoncci beettanaadan oottaas; hegee tana keehi maaddiis. Yeekkanau yeellatabeykke” yaagada hassayausu. (Roome 12:15 xeellite) Inttekka afuxxanaassi yeellatana bessenna. Kasetidi beˈidoogaadan, Geeshsha Maxaafay—Yesuusa gujjidi—aynne yeellatennan afuxxi yeekkida ammaniya asaabaa yootees.—Doomettaabaa 50:3; 2 Sameela 1:11, 12; Yohaannisa 11:33, 35.

Amarida wodiyau intte azzaniyo hanotay matan matan laamettana danddayees. Intte qoppennan afuttay gukkana danddayees. Issi azinay hayqqido maccaasiya giyaa biyo wode (kase darotoo ba azinaara bausu) kase meezeto ogiyan ubba qassi azinay dosiyo qumaa kushiyan oyqqiyo wode afuxxiyoogaa doommausu. Danddayanchcha gidite. Afuxxana bessenna giidi naagoppite. Hageeti kayyottanau bessiyaanne koshshiya oge gidiyoogaa hassayite.

Kasetidi akeekidoogaadan, siiqiyo asi hayqqiyo wode, issoti issoti banttana mooranchcha kessoosona. Ammanettida asa gidida Yaaqoobi a naˈaa Yooseefa “iita do7i a mirggiis” yaagidi ammananaadan oottin, keehippe kayyottidoy hegaassa. Yooseefi biidi ba ishanttu payyatettaa xomoosanaadan kiittiday Yaaqooba. Yaatiyo gishshau, Yaaqoobi ‘Yooseefi barkka baanaadan ayssi kiittidanaa? Iita doˈati deˈiyo heeraa kanttidi baanaadan ayssi oottidanaa?’ yaagidi bana mooranchchadan qoppennan aggenna.—Doomettaabaa 37:33-35.

Geella intte siiqiyo asa hayquwaassi, intte shenehoo guussay gaaso gididaadan qoppennan aggekketa. Hegaa mala bana mooranachcha oottiyo qofay—tuma gidin woy coo qofa gidin, kayyottiyo ogettuppe issuwaa gidiyoogaa eriyoogee maaddana danddayees. Hegaa mala qofatakka intte huuphe xalaalaassi qotti oyqqana bessenna. Ay keena intte huuphiyaa mooranchchadan xeelliyaakko haasayiyoogee, mishoy kiyanaadan maaddees.

Ay keena hara asa siiqiyaaba gidikkokka, a deˈuwaa naagana woy ‘wodeenne qoppennan gayttiyaabay’ ehiyoobaappe teqqana danddayennaagaa akeekana bessees. (Eranchchaa 9:11) Hegaa bolli intte oottidobay, qohanau qoppidi gidennaagau  siree baawa. Leemisuwau, ellellidi haakime keettaa efibeennay, intte siiqiyo asi harggidi hayqqana mala koyido gishshataassee? Gidennaagee qoncce! Yaatiyo gishshau, he uraa hayquwaassi gaasodan, inttena mooranchcha oottiyoogee likkee? CHii.

Issi aayyiyaa ba naˈiya kaamiyaa daafan hayqqa simmin, bana mooranchchadan qoppiyoogaa waana danddayidaakko hagaattuwaa odausu: “O kiittiday tana gidiyo gishshau mooranchchadan qoppaas. SHin hegaadan qoppiyoogee bessennaba gidiyoogaa akeekaas. I aawaara o issibaassi kiittidoogau aybanne bali baa. Hegee qoppennan gakkida daafa.”

‘SHin ta gaanau woy oottana koyiyo darobay deˈeshin attiis,’ giidi qoppana danddayeeta. SHin, nu giddon polo gidida aaway, aayyiyaa woy naˈay oonee? Geeshsha Maxaafay: “Nuuni ubbaikka daroban baleettees; issi urai ba haasayan mulekka balana xayikko, i bana naaganau danddayiya bali bainna asa” yaagidi hassayissees. (Yaaqooba 3:2; Roome 5:12) Yaatiyo gishshau, polo gidennaagaa dogoppite. Ubbabaa denttidi “Ta hagaadan oottidaba gidiyakko” yaagidi qoppiyoogee elle minettennaadan oottikkoppe attin, hara aybanne ehiyo laamee baawa.

Intte coo qofan gidennan tumuppe mooranchcha gidiyoogaa ammanttiya gaasoy deˈikko, intte huuphiyaa mooranchcha oottidi xeelliyoogaappe woppissiya aybippenne aadhdhidi koshshiyaabi deˈiyoogaa qoppite; hegeekka Xoossaa Maarotettaa. Geeshsha Maxaafay: “Abeet GODAU, neeni nu nagaraa mazggafan xaafidaakko, abeet Godau, woni ooni pirddaappe attanau danddayii? . . . nuuyyo atto yaagaasa” yaagidi boxooxxisees. (Mazamure 130:3, 4) Aadhdhida wodiya guyye zaaranaunne aybanne laammanau danddayekketa. SHin kase oottido moorowaassi Xoossay atto gaanaadan woossana danddayeeta. Hegaappe guyyiyan shin? Xoossay intte mooruwaa muleera atto giyaba gidikko, intte intte huuphiyaa atto gaana bessennee?—Leemiso 28:13; 1 Yohaannisa 1:9.

Geella haakimeta, narsseta, laggeta woykko hayqqidaageeta hanqqetettii? Hageekka asi hayqqiyo wode deˈiyaba gidiyoogaa akeekite. Geella hanqoy intte qohettidoogaappe denddidaagan yiidaba gidana danddayees. Issi xaafiyaagee: “Intte hanqoy kaalettiyo bashshaappe attanau danddayiyoy, hanqqettennaadan giidi naagettiyoogaana gidennan, hanqoy siyettiyoogaa—eriyoogaananne akeekiyoogaana” yaagiis.

Intte hanquwaa qonccissiyoogee woy yootiyoogee maaddana danddayees. Waatidii? Yiilluwan suulliyoogaa gidennaagee qoncce. Geeshsha Maxaafay hanquwan gamˈˈiyoogee iita qohuwaa kaalettiyoogaa bessees. (Leemiso 14:29, 30) SHin intte qofaa akeekiya laggiyaayyo intteyyo siyettiyaaba yootiyoogee, inttena minttettana danddayees. Qassi issoti issoti hanqqettiyo wodiyan, ispporttiyaa oottiyoogee bantta hanquwaappe simmanaadan oottidoogaa akeekidosona.—Efisoona 4:25, 26 kka xeellite

Qofaa qoncciyaninne aybanne qottennan yootiyoogee koshshiyaaba gidikkonne akeekan gidana bessees. Intte qofaa qoncciyan yootiyoogaaninne hanquwan suullidi haasayiyoogan dummatettay deˈees. Intte hanquwaunne yiilluwau haraata gaaso oottiyoogee koshshennaba. Yaatiyo gishshau, intte qofaa haraatuyyo yootiyo wodiyan wozanaama giditeppe attin yiillotoppite. (Leemiso 18:21) Kayyottiyogaappe minettanau danddayissiya gita maaddoy deˈees; hegaa haˈˈi tobbana.

Geeshsha Maxaafay: “GODAI wozanai me77idoogeetussi mataana; qassi bantta ayyaanan liiqidaageeta ashshees” yaagidi boxooxxissees. (Mazamure 34:18) Ee, intte siiqiyo asi hayqqiyo  wode, aybippekka inttena sohuwaara minttettana danddayiyaagee, Xoossaara deˈiya dabbotetta. Waatidii? Hanno gakkanau denttido maaddiya qofati ubbay baasettidoy Xoossaa Qaalaa gidida Geeshsha Maxaafaana. Hageeta oosuwan peeshshiyoogan minettana danddayeeta.

Hegaa bollan qassi woosay immiyo goˈˈaa guuttidi xeelloppite. Geeshsha Maxaafay: “Ne toohuwaa Xoossan wotta; i nena zemppissana” yaagidi nuna minttettees. (Mazamure 55:22) Intte qofaa inttena minttettana danddayiya laggiyaayyo yootiyoogee maaddiyaaba gidikko, intte wozanaa “minttetto ubbaa Xoossaa” gididaagau qoncceyiyoogee ay keena maaddaneeshshaa!—2 Qoronttoosa 1:3.

Woosay coo loˈˈo hanotay deˈana xalla oottenna. ‘Woosaa siyiyaagee’ wozanappe oychchiya ba ashkkaratussi xillo ayyaana immanau qaalaa geliis. (Mazamure 65:2; Luqaasa 11:13) Xoossaa xillo ayyaanay woykko oosuwan peˈiya a wolqqay, issi gallassaappe hara gallassau gakkanaadan intteyyo “ubbaappe aadhdhiya wolqqai” deˈanaadan maaddana. (2 Qoronttoosa 4:7) Xoossay ba ammanettida ashkkarata ay metuwaakka gidin genccidi aattanaadan maaddana danddayiyoogaa akeekite.

Naˈiyaa hayqqido issi maccaasiya, onne i azinaa woosay mishuwaa danddayanaadan ay keena maaddidaakko hassayausu. “Qamman son deˈiyo wode keehippe kayyottikko, cenggurssaa xoqqu oottidi issippe woossoos” yaagausu. “A baynnasan aybakka gidin oottiyo koyro wodiyan, giishin koyro gallassi gubaaˈiya biyo wodiyan, koyro gita shiiquwan beettiyo wodiyan minettanaadan woossida. Wonttaara denddiyo wodiyaninne ubbabay danddayettennaba milattiyo wodiyan, Yihooway nuna minttanaadan woossida. Tarkka soo geliyo wodiyan gaasuwaa erana xayikkonne keehippe kayyottayiis. Hegaappe denddidaagan tarkka soo geliyo wodiyan, Yihoowayyo hayyana taayyo woppaa immarkki gaada i maaddanaadan woossayiis.” Ha ammanettida maccaasiyaa woosay keehi maaddidoogaa minttada ammanausu. Inttekka gencci woossidi demmiyo zaaruwan ‘eratettaa ubbaappe aadhdhiya Xoossaa sarotettay intte wozanaanne intte qofaa naaganaagaa’ akeekana danddayeeta.—Piliphphisiyuusa 4:6, 7; Roome 12:12.

Xoossay immiyo maadoy, inttena gakkida mishuwan keehi maaddees. Kiristtaane gidida Kiitettida PHauloosi “Xoossai nuna nu huuphen minttettido minttettuwaadan, daro waayiyaa waayettiyaageeta nuunikka minttettanaadan, nu waaye ubban i nuna minttettees” yaagiis. Xoossay immiyo maadoy mishuwa xayssennaagee tuma shin, intte wolqqay danddayiyoogaappe darennaadan oottees. Hagaa giyoogee yeekkekketa woykko intte siiqiyoogeeta muleera dogeeta giyoogaa gidenna. SHin mishettiyoogaappe minettana danddayeeta. Intte hegaadan minettidi demmiyo eray inttegaa mala mishoy gakkidoogeetakka etau siyettiyaaba akeekidi loytti minttettanaadan maaddees.—2 Qoronttoosa 1:4.