SHiiquwaa Yiidaageetussi Qonccissuwaa
DUMMA SHIIQUWAA
KAWOTETTAA MISHIRAACHUWAA YOOTIYAAGEETU TIMIRTTE KEETTAA Layttay 23-65 gidido, bantta haggaazuwaa aassana koyiya aqinyeti Woggaa gallassi saateppe guyyiyan, Kawotettaa Mishiraachuwaa Yootiyaageetu Timirtte Keettan tamaaranawu mazggafettiya ishatuura shiiqanaadan shoobboos. SHiiquwaa sohoynne wodee kasetidi odettana. “Xala Gida”! 2018 YIHOOWA MARKKATU KILLILIYAA SHIIQUWAA Yihoowa Markkata Bolla Gididi Heemmiyaagan Giigidaagaa
SHIIQUWAA YIIDAAGEETUSSI QONCCISSUWAA
AKKAMUWAN KOYRO MAADUWAA Hayyanintta hagee giigidoy QOPPENNAN SAHETTIDAAGEETU XALLAASSA gidiyoogaa hassayite.
BAYI BEETTIDABATA WOTTIYO KIFILIYAA Bayi beettida ubbabata, Bayi Beettidabata Wottiyo Kifiliyaa efaana bessees. Inttessi bayidabi deˈikko, he kifiliyaa biidi inttebaa dooridi ekkite. Bantta soo asaappe shaahettida naata, bayi beettidabata wottiyo kifiliyaa efaana bessees. SHin ha sohuwaa naati kaaˈiiddi peˈiyo sohodan xeellana bessenna. Hayyanintta intte naata naagite; intte matappe haakkanaadan oottoppite.
DOSAN OOTTIYOOBATA Killiliyaa shiiquwaara gayttidaagan oosettiya dumma dumma oosuwaa oottana koyikko, hayyanintta ha kifiliyawu erissite.
MIISHSHAA IMMIYOOGAA SHiiqoy ufayssiyaagaanne Yihoowakko siiqanawu maaddiyaagaa gidanaadan, ubbawu gidiya oydee, cenggurssaanne biiduwaa miishshatinne hara goˈˈiya darobati giigidosona; hegawu daro miishshay kiyiis. Intte intte dosan immiyo miishshaa he kessiyo miishshawunne kumetta saˈan oosettiya oosuwawu goˈettoos. Miishshaa yeggiyo saaxineti shiiquwaa sohuwan injjetiyaasan deˈoosona. Eta bolli qoncce malaatay deˈees. Intte immiyo miishshawu keehippe galatoos; Kawotettaa oosuwawu koshshiyaabaa intte kehatettan immidi maaddiyo gishshawu, Bolla Gididi Heemmiyaagee galatees.
MOKKIYAAGEETA Mokkiyaageetu oosoy inttena maaddiyoogaa. Kaamiyaa essiyo sohuwaa, cora asay yaanne haanne biyo sohuwaa, uttiyo sohuwaa asassi oyqqiyoogaanne harabaa xeelliyaagan, eti yootiyoogaa siyiyoogan hayyanintta etaara hashetite.
UTTIYO OYDETA Hayyanintta haratussi qoppite. Uttiyoosaa oyqqana bessiyoy, inttenaara issippe yiya, inttenaara issi keettan deˈiyaanne intte xannaˈissiyo asatu xallaassa gidiyoogaa hassayite. Intte matan deˈiya mela oydiyan issi issibaa coo wottoppite.
XINQQATIYAA Xammaqettanawu giigidaageeti madirakiyawu baazzan deˈiya, etassi giigida sohuwan uttoosona. Xammaqettanawu giigidaageeti Qeeraa gallassi maallado xinqqatiyaa haasayay doomettanaappe kase etawu giigida sohuwan uttana bessees. Eti ubbay pooxaanne xammaqettiyo wode maayiyo suure maayuwaa ehaana bessees.
Yihoowa Markkata Bolla Gididi Heemmiyaagan Giigidaagaa
