TIMIRTTE 05
Geeshsha Maxaafan Xoossay Yootidobay Deꞌees
Yihooway nuussi Geeshsha Maxaafaa immiis. Hegee maalaalissiya imota; an 66 guutta maxaafati deꞌoosona. SHin neeni hagaadan qoppana danddayaasa: ‘Geeshsha Maxaafay waani xaafettidee? A xaafissiday oonee?’ Ha oyshata zaaranawu, Geeshsha Maxaafan deꞌiya ba qofaa Xoossay nuussi waati yootidaakko beꞌa.
1. Geeshsha Maxaafaa asi xaafidaba gidikko, A xaafissiday Xoossaa waani gidii?
Geeshsha Maxaafaa 40 gidiya dumma dumma attuma asati xaafidosona. Geeshsha Maxaafan deꞌiya koyro maxaafay 3500 gidiya layttaappe kase xaafettiis; qassi wurssetta maxaafay 1900 gidiya layttaappe kase xaafettiis. Geeshsha Maxaafaa xaafidaageeti issoy issuwaappe keehi dummatoosona; issoti issoti henttanchchata, harati moliyaa oyqqiyaageetanne kawota. Xaafida asati dumma dumma gidikkokka, eti xaafidobay ubbay maayettees. Hegee waani hanana danddayidee? Geeshsha Maxaafaa xaafissiday Xoossaa gidiyo gishshataassa. (1 Tasalonqqe 2:13 nabbaba.) A xaafidaageeti bantta qofaa xaafibookkona. Eti “Geeshsha Ayyaanai kaalettin, Xoossaa qaalaa [haasayidosona].” a (2 PHeexiroosa 1:21) Xoossay amarida attuma asati ba qofaa xaafanaadan ba geeshsha ayyaanan denttettiis.—2 Ximootiyoosa 3:16.
2. Geeshsha Maxaafay ubba asaa maaddana danddayii?
Geeshsha Maxaafan deꞌiya mishiraachchoy ‘zare ubbaa, qommo ubbaa, dumma dumma biittaa qaala ubbaanne yara ubbaa’ asaa maaddanaagaa Xoossay yootiis. (Ajjuutaa 14:6 nabbaba.) Ha wodiyan, Geeshsha Maxaafay hara ay maxaafaagaappenne dariya doonatun deꞌees. Ha wodiyan Xoossay yootiyoobaa siyiyay ubba asaa gaana danddayoos. Asay awan deꞌin woy ay qaalaa haasayinkka hegaa siyana danddayees.
3. Geeshsha Maxaafay xayennaadan Yihooway waati naagidee?
Geeshsha Maxaafay daro gamꞌꞌennabatun xaafettiis. SHin Geeshsha Maxaafaa dosiya amarida attuma asati akeekan A zaari zaaridi kushiyan xaafidosona. Maatay deꞌiyo asati Geeshsha Maxaafaa xayssanawu malikkonne, harati bantta shemppuwaa shenehoo giidi A naagidosona. Yihooway nuna haasayissennaadan ooninne woy aybinne diggana danddayibeenna. Geeshsha Maxaafay, “Xoossaa qaalai merinau eqqidi de7ees” yaagees.—Isiyaasa 40:8.
LOYTTA AKEEKA
Geeshsha Maxaafaa xaafanaadan Xoossay amarida attuma asata waati kaalettidaakko, hegee xayennaadan I waati naagidaakko, qassi hegaa asay demmanaadan waati oottidaakko akeeka.
4. Geeshsha Maxaafay A ooni xaafissidaakko yootees
BIIDUWAA beꞌite. Yaatidi 2 Ximootiyoosa 3:16 nabbabite; qassi kaallidi deꞌiya oyshata tobbite.
-
Geeshsha Maxaafaa asi xaafidaba gidikko, hegee Xoossaa Qaalaa geetettiyoy aybissee?
-
Xaafiya asatussi Xoossay ba qofaa yootiis giidi ammaniyoogee bessiyaaba gaada qoppay?
Issi asi dabddaabbiyaa hara uraa xaafissana danddayees. Hegaadankka, Geeshsha Maxaafaa asi xaafikkonne, an deꞌiya qofay Xoossaagaa
5. Geeshsha Maxaafaa xayssanawu malikkokka I xayibeenna
Geeshsha Maxaafay Xoossaa Qaala gidiyo gishshawu, I xayennaadan Xoossay naagana giidi qoppoos. Taarikiyan odettida wode ubban, wolqqaama asati Geeshsha Maxaafaa xayssanawu malidosona. Haymaanootiyaa kaalettiyaageeti asay Geeshsha Maxaafaa nabbabanaadan koyibookkona. SHin daroti harati eta yedettishiininne woranawu yashissishin, bantta shemppuwaa shenehoo giidi Geeshsha Maxaafaa naagidosona. Hegaa mala asatuppe issuwaabaa eranawu, BIIDUWAA beꞌite; yaatidi kaallidi deꞌiya oyshata tobbite.
-
Geeshsha Maxaafay xayennaadan naaganawu hegaa keena gitabay oosettidoogaa eriyoogee neeni A nabbabanaadan denttettennee? Denttettikko aybissi?
Mazamure 119:97 nabbabite; yaatidi ha oyshaa tobbite:
-
Daro asay ba shemppuwaa shenehoo giidi Geeshsha Maxaafaa birshshanaadaaninne asawu immanaadan denttettidabay aybee?
6. Ubba asawu haniya maxaafaa
Asi deꞌido wode ubban Geeshsha Maxaafaagaa keena keehi daro qaalan birshshettidanne daro asawu imettida maxaafi baawa. Oosuwaa 10:34, 35 nabbabite; yaatidi ha oyshata tobbite:
-
Xoossay ba Qaalay keehi daro qaalan birshshettanaadaaninne daro asawu imettanaadan koyiyoy aybissee?
-
Geeshsha Maxaafaara gayttidaagan nena ufayssiyay aybee?
Alamiyan
100%
gidiya asay
ba eriyo qaalan Geeshsha Maxaafaa demmana danddayees
Kumetta Geeshsha Maxaafay woy appe amaridaagee
3,000ppe
dariya qaalan
deꞌees
5,000,000,000
Hagaa keenay attamettiis geetettees,
hara ay maxaafaagaappekka aadhdhees
ISSI ISSI ASAY HAGAADAN GEES: “Geeshsha Maxaafay asi xaafido beni maxaafa.”
-
Ne qofay aybee?
-
Geeshsha Maxaafay Xoossaa Qaala gidiyoogaa bessiya naqaashay aybee?
AY AKEEKADII?
Geeshsha Maxaafay Xoossaa Qaala; qassi I ubba asay he maxaafaa demmanaadan oottiis.
Zaaretuwaa
-
Xoossay kaalettin asay Geeshsha Maxaafaa xaafiis giyoogee woygiyoogee?
-
Geeshsha Maxaafay xayibeennaagaa, birshshettidoogaanne daro asaa gakkidoogaa xeelliyaagan nena maalaaliyaabay aybee?
-
Xoossay nena haasayissanawu hegaadan oottidoogaa haꞌꞌi erido gishshawu, A xeelliyaagan neeyyo aybi siyettii?
PILGGA
Kushiyan beni xaafettidaagaappe doommidi ha wodiyaa birshshettata gakkanawu deꞌiya Geeshsha Maxaafaa taarikiyaa nabbaba.
“Geeshsha Maxaafay Waanidi Ha Wodiyaa Gakkanaashin Deꞌidee?” (Beegottite! huuphe yohuwaa)
Geeshsha Maxaafaa xayssanawu oottido heezzu keehi iitabaappe I xayennan waani attidaakko akeeka.
“Geeshsha Maxaafaa Gakkida Paaceti Aybee?” (Wochchiyo Keelaa huuphe yohuwaa)
Geeshsha Maxaafaa birshshanawu asay ba shemppuwaa shenehoo giidoogaa akeeka.
Geeshsha Maxaafay darotoo birshshettiis, qassi darotoo kushiyan xaafettiis. Xoossaa Qaalay laamettibeennaagaa neeni waana ammanettana danddayay?
a Timirtte 07n beꞌanaagaadan, geeshsha ayyaanay Xoossaa wolqqa.
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
